VOV4.Jarai - Čơtlăm lơ 20/4, Khua dêh čar ta ơi Phạm Minh Chính bơkơtuai laih amăng telephôn hăng Khua dêh čar Italia Mario Draghi. Dua gơñu hmâo tŭ ư hrom kơtưn bơkơtuai ƀơi hơdôm gưl, biă ñu lĕ gưl dlông hăng ngă tui ba glăi bôh tơhnal dong Jơlan hơdră pok pơhai gum hrom 2021-2023.

Ơi Phạm Minh Chính bơkơtuai amăng telephôn hăng Khua dêh čar Italia

Dua bơnah mơ-ak lăng ƀuh giăm hmâo 2 thun ngă tui Tơlơi pơkôl sĭ mơdrô Việt Nam hăng EU (EVFTA), bơkơtuai bruă sĭ mơdrô dua bơnah ba glăi bôh than klă. Amăng thun 2021, prăk pơhrui glăi mơng dua bơnah hmâo 5 klai 600 klăk dolar Mi, đĭ 20% bơhmu hăng thun 2020. Khua dêh čar ta ơi Phạm Minh Chính rơkâo Italia tañ pơsit Tơlơi pơkôl pơgang ba tuh pơplai Việt Nam hăng EU (EVFTA), tañ tŭ yap hră vaccine hăng ngă gal brơi kơ gơnam tam Việt Nam ƀơi anih sĭ mơdrô, biă ñu hơdôm gơnam mă mơng đang hmua, gơnam ƀong huă, bôh troh kah hăng bôh pơ-ô̆, thanh long, vải thiều./.

Siu H’ Prăk: Pơblang