Tơdơi kơ ngă Lơphet čơkă mơtăm, dua Khua dua bôh dêh čar pơphun bơkơtuai. Amăng mông bơkơtuai, Khua dêh čar ta ơi Phạm Minh Chính pơdah pran jua mơ-ak tal blung a nao čuă dêh čar Luxembourg, bơni tơlơi čơkă jum yôm phăn hăng tŏng ten mơng Gong gai dêh čar Luxembourg pioh kơ Grŭp.

Khua dêh čar pơtŏng sit Việt Nam lăng yôm na nao tơlơi rô nao rai gum hrom hăng gum hrom abih bang hăng Luxembourg, sa ding kơna pơjing, hmâo bruă mă yôm phăn mơng Khul pơlir hơbit kual Mi Kô̆ (EU). Čơkă Khua dêh čar ta, tal nao čuă gưl dlông blung a tơdơi kơ 10 thun kơplah wah dua bôh dêh čar, Khua dêh čar ơi Xavier Bettel pơsit yôm bôh tŭ yua yôm phăn mơng tal nao čuă, pơpdah pran jua đăo gơnang tal nao čuă amra ngă hrơi tơlơi rô nao rai dua bơnah pơphun rơwang pơđĭ kyar phrâo.

Dua Khua dêh čar lăi rơđah tơhnal yôm phăn mơng bruă pok pơhai ba glăi bôh tơhnal rơwang gum hrom hmâo laih, hrom hăng anun kơsem min pơdŏng hơdră gum hrom lăp djơ̆ hăng tơhnal gal, tơlơi kiăng pơđĭ kyar mơng dua bôh dêh čar. Dua bơnah tŭ ư pơtrut tañ pơdŏng rơwang Pơplih phrâo bruă khom ngă gah prăk kak mơtah, kiăng mă yua anô̆ gal mơng Luxembourg kơ prăk mă yua kơ bruă, biă ñu prăk kak mơtah, kiăng djru Việt Nam pok pơhai Bruă pơđĭ kyar pơlar dlai tlô hăng gir run bŏng glăi hăng ayuh hyiăng ƀu klă, amăng anun hmâo bruă ngă tui hơdôm tơlơi pơkôl hmâo ba tơbiă ƀơi COP 26./.