VOV4.Jarai - Čơtlăm lơ 21/6 ƀơi Ƀirô mă bruă Kơnuk kơna, Khua dêh čar ta ơi Phạm Minh Chính hmâo bơkơtuai laih hăng Khua git gai wai lăng pơ ala mơnuih ƀôn sang dêh čar Mozambique Esperança Bias glăk rai čuă dêh čar Việt Nam. Khua dêh čar ta ơi Phạm Minh Chính hơ-ư̆č hmưi Mozabique tal blung a dưi ruah ngă Ding kơna gum bruă Khul pơgang rơnuk rơnua Sang gum hơbit djop dêh čar rơwang bruă 2023-2024 hăng mrô hră plĕ ruah lăp djă pioh hăng đăo gơnang Mozambique amra ngă giong klă bruă phun anai, djru klă amăng tơlơi rơnuk rơnua, hơđong, gum hrom hăng pơđĭ kyar kual hăng rŏng lŏn tơnah. Khua dêh čar ta pơsit tơhnal gal gum hrom kơplah wah Việt Nam hăng Mozambique dô̆ prong biă, Việt Nam amra lăi pơthâo tơlơi găn rơgao pơđĭ kyar hăng pơtom hiăp, mut hrom hăng Mozambique; ba tơbiă hơdôm bruă mă kiăng ngă dơlăm hloh dong tơlơi rô nao rai dua bơnah hăng čang rơmang Khua pơ ala mơnuih ƀôn sang dua bôh dêh čar dŏng yua dong, ngă gal brơi lŏm pok pơhai. Khua git gai wai lăng pơ ala mơnuih ƀôn sang dêh čar Mozambique pơsit, Mozambique lăng Việt Nam lĕ sa amăng hơdôm bơnah gum hrom yôm phăn hloh ƀơi kual ASIA; pơkôl ngă tui bruă khua pơ ala mơnuih ƀôn sang dŏng yua hăng ngă gal kơ bruă pơtrut gum hrom kơplah wah dua bôh dêh čar./.

Siu H’ Prăk: Pơblang