VOV4.Jarai - Mơguah lơ 30/8, ƀơi Sang rông Thống Nhất, ƀôn prong Hồ Chí Minh Khua dêh čar ta ơi Phạm Minh Chính hmâo bưp ƀô̆ mơta bơni hơdôm khul đăo hmâo gum hơgôp amăng bruă pơdŏng hăng pơgang lŏn ia. Việt Nam lĕ sa bôh dêh čar hmâo lu tơlơi đăo, hmâo 43 khul grŭp gah 16 mơta tơlơi đăo dưi hmâo Kơnuk kơna tŭ yap hăng pơsit hră pơ-ar jơnum khul đăo; rơbêh kơ 26 klăk 500 rơbâo čô mơnuih tui đăo, dưm dưm hăng 27% mrô mơnuih ƀôn sang amăng đơ đam dêh čar.

Amăng mông jơnum lu khua pơ ala lĕ mơnuih apăn bruă đăo hmâo lăi tơbiă hơdôm tơlơi gum pơhiăp bă kơ pran jua tơpă sit hăng gơgrong, hăng pran jua pơdŏng kiăng pok pơhai sit nik, ba glăi bôh tơhnal dong hơdră pơtrun, hơdră bruă, tơlơi phiăn gah pioh kơ đăo, khul đăo mơng Ping gah, Kơnuk kơna ta pơ̆ anăp anai. Pơhiăp amăng mông jơnum, Khua dêh čar ta ơi Phạm Minh Chính pơsit, Kơnuk kơna ta ha sa ngă tui hơdră bruă pioh kơ tơlơi đăo hăng pơhlôm tơlơi dưi pô, tơlơi đăo mơng mơnuih ƀôn sang. Pơ̆ anăp anai, Khua dêh čar rơkâo Khua mua hơdôm khul đăo pơsur dong hơdôm mơnuih apăn bruă đăo, khul đăo, mơnuih tui đăo ngă tui hơdră pơtrun, jơlan gah mơng Ping gah, hơdră bruă, tơlơi phiăn mơng Kơnuk kơna. Djă pioh jơlan gah bruă đăo nao hrom hăng djuai ania. Hơkrŭ pran jua gum hrom hơbit djuai ania, gum hrom hơbit khul đăo./.

Siu H’ Prăk: Pơblang