Mơmot tom brơi (23/10, yap tui mông dêh čar Nga), amăng rơwang hơdôm bruă mă pơhmư̆ Jơnum gưl dlông ƀing khua mua BRICS pok prong ƀơi Kazan, dêh čar Nga, Khua dêh čar ta ơi Phạm Minh Chính hmâo bưp Khua mir sir dêh čar Thổ Nhĩ Kỳ Recep Tayyip Erdogan. Khua dêh čar ta pơtŏng sit lăng yôm tơlơi rô nao rai giăng mah hăng gum hrŏm klă hiam Việt Nam hăng Thổ Nhĩ Kỳ; čang rơmang hơdôm bôh anom bơwih ƀong Thổ Nhĩ Kỳ đing nao tuh pơplai dong kơ Việt Nam.

Dua gơñu tŭ ư kơtưn lăi pơthâo, pơbưp kơplah wah khua mua gưl dlông dua bôh dêh čar, tañ pơđĭ dlông hăng ngă dơlăm hloh dong tơlơi rô nao rai dua bôh dêh čar; pơtrut kơtang tơlơi bơwih ƀong, sĭ mơdrô lăp djơ̆ hăng tơhnal gal, hrưn đĭ dưi ngă djơ̆ hăng tơhnal pơkă prăk pơhrui glăi mơ̆ng gơnam sĭ nao rai dua bơnah 4 klai dolar Mi, hrŏm hăng anun kơsem min pơjing hơdôm rơwang bruă phrâo kiăng ngă gal brơi hloh dong kơ bruă sĭ mơdrô hăng tuh pơplai.

Hlâo kơ anun, ƀơi ƀôn prong Kazan, dêh čar Nga, Khua dêh čar ta ơi Phạm Minh Chính bưp khul mơnuih Việt Nam ƀơi Nga./.