Khua dêh čar hmâo lăi pơhing kơ mơnuih pơ ala bôh tơhnal tal jơnum lok 8 hăng tơlơi bơwih ƀong mơnuih mơnam mơ̆ng lŏn ia phrâo rơgao, tơlơi pơplih phrâo, dưm dăp pơphun glông jơlan mă bruă kơđi čar, hrŏ trun mơnuih mă bruă ƀong prăk blan kơnuk kơna nao hrŏm hăng dăp glăi, pơđĭ dlông anô̆ klă, mă yua ba glăi bôh tơhnal mơnuih apăn bruă, mơnuih mă bruă čar; hrŏ trun prăk mă yua na nao hăng djru pơplih hơdră bruă prăk blan.

Hrŏm hăng anun, Khua dêh čar ăt lăi glăi mơn hơdôm tơlơi gum pơhiăp mơnuih pơ ala đing nao, kah hăng: hơdôm tơlơi bơdjơ̆ nao anom mă yua jơlan nao rai, biă ñu lĕ jơlan đuăi hmar Kơdư – Dơnung dêh čar; Jơlan rơdêh treng đuăi hmar Kơdư – Dơnung dêh čar, hơdôm hơdră bruă pioh kơ mơnuih djru ngă hơkrŭ đưm hăng ngă hơkrŭ; tơlơi pơgăn ia ling dăo, pơgang hơđong ia yua kual lŏn dăo ia krông Cửu Long. Khua dêh čar pơtŏng sit ră anai, gong gai dêh čar hăng hơdôm anih anom glăk hmâo jơlan gah pơkă glăi klă djop 1 klăk ektar lŏn pioh ngă 1 klăk ektar hmua pơdai, pơjing anăn păn braih pơdai Việt Nam hmư̆ hing ƀơi rŏng lŏn tơnah, pơplih phrâo lu anih anom sĭ mơdrô, djru bôh thâo phrâo măi mok, mă yua pơplih mrô./.