VOV4.Jarai - Mơguah lơ 13/9, Khua dêh čar ta ơi Phạm Minh Chính hmâo git gai mông jơnum tal 17 mơng Grŭp črâo bruă pơgang, pơgăn klin Covid-19. Mông jơnum dưi pơphun lăng nao rai mơng ataih kơplah wah anih tô nao rai mơng Kơnuk kơna hăng 63 bôh tơring čar, ƀôn prong. Pơhiăp amăng mông jơnum, Khua dêh čar ta ơi Phạm Minh Chính brơi thâo: Truh ră anai, ƀing ta hmâo djă kơjăp hơđong bruă bơwih ƀong prong, wai lăng nua gơnam tam, hơkrŭ glăi bơwih ƀong hăng pơtrut pơđĭ kyar; tơlơi hơdip mơda mơnuih ƀôn sang dưi pơplih phrâo.

Khua dêh čar ta ơi Phạm Minh Chính git gai jơnum kơ pơgang, pơgăn klin Covid-19

Hơdôm bôh tơhnal anun lĕ gơnang kơ tơlơi git gai djơ̆, hmao tlôn mơng Grŭp mă bruă Ping gah dêh čar, ƀơi anăp, na nao lĕ Ding jum kơđi čar, Grŭp git gai Ping gah; tơlơi sa jua, gum hrom kơjăp mơng Khua pơ ala mơnuih ƀôn sang, tơlơi gum hrom mơng abih bang glông bruă kơđi čar.... Ƀing ta hmâo ngă tui truh kih laih bruă vaccine. Khă hnun hai, ră anai hmâo tơlơi pơmin ƀu đing nao, lui raih hăng klin ruă. Tơlơi pơmin ƀu đing nao lui raih yua anun bruă tlâ̆o vaccine akă djơ̆ tui tơhnal ba tơbiă tui pran jua git gai mơng Grŭp črâo ba. Anai lĕ tơlơi khom pơblang tŏng ten. Biă ñu tơlơi rơkâo, hơkrŭ pơsir tơlơi kơƀah ia jrao, gơnam mă yua măi mok gah ia jrao; pơhlôm mơnuih mă bruă ia jrao; kơtưn lăi pơhing, pơđĭ tui hloh dong tơlơi pơmin pơgang pơgăn klin mơng mơnuih ƀôn sang.

Siu H’ Prăk: Pơblang