Tui hăng tơlơi pơkă jơlan nao rai dŭ pơgiăng plơi prong jưh jom Hà Nội truh thun 2030 hăng tơhnal lăng truh thun 2050, glông jơlan rơdêh treng plơi prong jưh jom hmâo rơwang ataih năng ai ñu 410km. Tơlơi kiăng kơ prăk mă yua mơ̆ng ră anai truh thun 2030, Hà Nội khom hmâo năng ai ñu 15 klai dolar Mi. Ƀơi ƀôn prong Hồ Chí Minh, akô̆ bruă pơplih pơkra pơkă kual hrŏm truh thun 2040, tơhnal lăng nao truh thun 2060, glông jơlan rơdêh treng hmâo 12 ară jơlan, hăng abih bang rơwang ataih 510km. Abih bang tơlơi kiăng kơ prăk mă yua pơkra truh thun 2035 lĕ năng ai ñu rơbêh kơ 36 klai dolar Mi.

Klah čun bruă jơnum, Khua dêh čar ơi Phạm Minh Chính rơkâo lơm čih pơkra akô̆ bruă khom thâo pơmin phrâo, tơhnal lăng bruă mă, sui thun, ba glăi bôh tơhnal prong. Khua dêh čar rơkâo Ding jum jơlan glông dŭ pơgiăng, hơdôm ding jum, gơnong bruă hăng Hà Nội, ƀôn prong Hồ Chí Minh gum hrŏm ngă giong tơlơi pơkă, bruă mă djơ̆, tơhnal pơkă, rơwang mă bruă bơdjơ̆ nao pơlar jơlan rơdêh treng ƀôn prong. Rơkâo pơdŏng pơkra jơlan rơdêh treng ƀôn prong ruah mă hơdră phrâo rơnuk anai, lăp djơ̆ hăng tơlơi dưi mơ̆ng Việt Nam; pơplih phrâo hơdôm ngăn rơnoh, amăng anun hmâo ngăn rơnoh kơnuk kơna, ngăn rơnoh mơnuih ƀôn sang hăng prăk čan./.