VOV4.Jarai - Mơguah lơ 4/7, gah yŭ tơlơi git gai mơng Khua dêh čar ơi Phạm Minh Chính, hmâo pok phun Jơnum lăng nao rai mơng ataih Kơnuk kơna hăng hơdôm tơring čar, ƀôn prong hăng Mông jơnum Kơnuk kơna tui tơđar blan 6 thun 2022 kơ tơlơi bơwih ƀong – mơnuih mơnam blan 6 hăng 6 blan thun 2022. Pơhiăp amăng mông jơnum, Khua dêh čar ta ơi Phạm Minh Chính brơi thâo bruă bơwih ƀong mơnuih mơnam blan 6 hăng 6 blan akô̆ thun pơplih phrâo amăng abih bang hơdôm bruă, ƀuh ƀô̆ pơplih phrâo, pơjing gru djă pioh rơđah.

Anih jơnum

Bruă bơwih ƀong prong hơđong, gơnam đĭ nua dưi wai lăng khă hmâo lu tơlơi pơgô̆, biă ñu nua ia xăng ia jâu đĭ lu, hơdôm anô̆ ngă dưm kơnar prong dưi pơhlôm pơhrui hăng mă yua ngăn drăp, sĭ blơi gơnam hăng dêh čar tač rơngiao, mrô kiăng hăng hmâo mơnuih mă bruă, apui yua hăng braih piăng gơnam ƀong huă. Khua dêh čar ta lăi rơđah, hơdôm bôh tơhnal dưi ngă lĕ yua kơ tơlơi git gai luh gah mơng Grŭp mă bruă Ping gah dêh čar, Ding jum kơđi čar, Grŭp git gai Ping gah, apăn akô̆ lĕ Khua git gai Ping gah dêh čar ta ơi Nguyễn Phú Trọng, hrom hăng hơdôm hơdră bruă pơsit yôm phăn mơng Kơnuk kơna, amăng anun hmâo hơdôm Tơlơi pơtrun pơsit mơng Khua pơ ala mơnuih ƀôn sang; Tơlơi git gai, črâo bruă khut khăt, kơtang, hmâo phun than mơng Kơnuk kơna, Khua dêh čar ta, tơlơi gir run mơng abih bang glông bruă kơđi čar hrom hăng anom bơwih ƀong, tơlơi ha pran jua, dŏng yua mơng mơnuih ƀôn sang đơ đam dêh čar hăng tơlơi gir run mơng gơyut gơyâu jar kơmar./.

Siu H’ Prăk: Pơblang