VOV4.Jarai - Čơtlăm lơ 14/7, ƀơi Ƀirô mă bruă Kơnuk kơna, Khua dêh čar ta ơi Phạm Minh Chính git gai Jơnum pơđĭ kyar bruă sĭ mơdrô lŏn, sang pơhlôm klă, kơjăp phik. Jơnum pơphun tui hơdră lăng nao rai mơng ataih kơplah wah Ƀirô mă bruă Kơnuk kơna hăng Jơnum min mơnuih ƀôn sang 5 bôh ƀôn prong anun lĕ Hà Nội, ƀôn prong Hồ Chí Minh, Đà Nẵng, Hải Phòng, Cần Thơ.

Khua dêh čar Phạm Minh Chính pơhiăp amăng mông jơnum

Amăng mông jơnum, ƀing khua pơ ala đing nao bơkơtuai pơsit hăng pơkă lăng hlâo bruă sĭ blơi lŏn sang ƀơi Việt Nam, ba tơbiă jơlan gah, bruă pơsir kơ hơdră dăp hăng mrô kiăng pioh sĭ blơi lŏn sang pơđĭ kyar pơhlôm, klă, kơjăp. Pơhiăp amăng mông jơnum, Khua dêh čar ta ơi Phạm Minh Chính rơkâo hơdôm ding jum, gơnong bruă, ƀôn prong thâo kơjăp tơlơi pơđĭ kyar anai, anô̆ ngă dưm kơnar mrô kiăng hmâo hăng kiăng yua, pơjing bôh than klă, amăng anun đing nao kơ tơlơi hơdip mơda mơnuih mơnam hơđong; pơpŭ tơlơi phiăn sĭ mơdrô samơ̆ khom hmâo bruă wai lăng mơng Kơnuk kơna, ƀu pioh hmâo tơlơi ƀu klă./.

Siu H’ Prăk: Pơblang