VOV4.Jarai - Mơguah lơ 14/2, Grŭp črâo ba klah čun Tơlơi pơtrun pơsit mrô 19 mơng Jơnum tal 6 Grŭp mă bruă Ping gah dêh čar tal 11 kơ pơplih phrâo dong hơdră bruă, tơlơi phiăn gah lŏn mơnai amăng rơnuk pơtrut kơtang abih bang bruă pơplih phrâo. Ơi Phạm Minh Chính, ding kơna Ding jum kơđi čar, Khua dêh čar, Khua Grŭp črâo ba klah čun Tơlơi pơtrun pơsit mrô 19 git gai bruă jơnum.

Tơdơi kơ hmư̆ hơdôm tơlơi gum pơhiăp bơkơtuai, pơphiăp klah čun, Khua dêh čar ta ơi Phạm Minh Chính lăi rơđah sa dua tơlơi pơkă phun lĕ bruă pơplih pơkra Tơlơi phiăn lŏn mơnai pơhlôm ha amăng plĕ hăng hơdôm tơlơi phiăn hmâo bơdjơ̆ nao; djơ̆ hăng hơdră bruă kơđi čar mơng Việt Nam. Gah bruă mă tô̆ tui, Khua dêh čar ta rơkâo Grŭp črâo ba bruă git gai Grŭp dăp hơdră hăng hơdôm ƀirô hmâo bơdjơ̆ nao tañ tŭ mă đut hlah hơdôm tơlơi gum pơhiăp mơng ƀing ding kơna Grŭp črâo ba, hơdôm Grŭp, ding jum, gơnong bruă, ƀirô kơnuk kơna hăng hơdôm bôh tơring čar, ƀôn prong, ƀing juăt bruă, mơnuih kơsem min, ruah mă, pơlir hơbit kiăng ngă giong hơdôm tơlơi lăi pơthâo glăi, tơlơi čih pơkra, lăi pơthâo gưl hmâo tơlơi dưi amăng hơdôm hrơi tañ hloh pơhlôm rơnoh bruă, anô̆ kơjăp ñu./.

Siu H’ Prăk: Pơblang