VOV4.Jarai - Mơguah lơ 4/4, ƀơi ƀirô mă bruă Gong gai dêh čar ta, Khua dêh čar ta ơi Phạm Minh Chính git gai mông jơnum Gong gai dêh čar tui tơđar blan 3 pơsit glăi bôh tơhnal blan 3 hăng lăng glăi 3 blan tal sa thun 2022. Khua dêh čar brơi thâo, tơlơi kơđi čar ƀu hơđong, tơlơi bơkơtưn ƀơi dêh čar pơprong kơtang đĭ, nua ia jâu ia xăng blơi mut hăng đĭ nua ƀơi lu dêh čar đĭ lu; tơlơi klin ruă ngă tơnap, ba truh tơnap kơ bruă bơwih ƀong, bruă bơwih ƀong huă sĭ mơdrô amăng lŏn ia. Khua dêh čar ta rơkâo, khom tơpă pơsit hơdôm tơlơi kah hăng pơsir prăk tuh pơplai bruă hrom ăt ƀu lu mơn, dô̆ tơdu đôč; tơlơi gơnam tam dô̆ đông glăi ƀơi guai lŏn ia ngă klă samơ̆ akă dưi pơsir abih ôh; sa dua mơnuih ƀôn sang ƀơi kual asuek, ataih dô̆ tơnap tap; amăng bruă tlâ̆o vaccine pơgang klin ruă ƀu đing nao yôm ôh, bruă tlâ̆o pơgang akă djơ̆ rơnoh pơkă samơ̆ čang rơmang, khom tañ hơkrŭ pơsir tơlơi akă dưi ngă, akă dưi pơsir amăng 3 blan tal 1 thun 2022; bŏng glăi tañ ba glăi bôh tơhnal hăng hơdôm tơlơi phrâo, hơdôm tơlơi amra phrâo pơphun hmâo./.

Siu H’ Prăk: Pơblang