VOV4.Jarai - Mơguah lơ 19/4, ƀơi Ƀirô mă bruă Gong gai dêh čar ta, Khua dêh čar ta ơi Phạm  Minh Chính git gai mông jơnum Gong gai dêh čar tui akô̆ bruă kơ ngă tui hơdră bruă, tơlơi phiăn bruă pơkă kual yap mơng hrơi Tơlơi phiăn pơkă kual mă yua.

Amăng mông jơnum, Khua dêh čar ta ơi Phạm Minh Chính brơi thâo, amăng mông jơnum anai kiăng pơsit bôh tơhnal mă bruă pơkă kual, tơlơi hrăm, bôh than ba truh; hơdôm tơlơi gun, tơlơi tơnăp; bruă mă, jơlan gah pơđĭ kơjăp bruă pơkă kual pơ̆ anăp anai. Khua dêh čar ta ơi Phạm Minh Chính rơkâo ƀing khua pơ ala nao pơhmư̆ đing nao bơkơtuai hơdôm tơlơi kah hăng: bruă ngă giong pơkă kual thun 2022; pơsit rơđah bruă bơkơtuai mơng kual pơkă abih bang ƀơi lŏn ia; tơlơi rô nao rai kơplah wah hơdôm kual pơkă; tơlơi tum pơƀut kual pơkă; ruah mă lăi pơthâo pơkă kual... Khua dêh čar ta lăi rơđah, bruă pơkă kual hmâo hơdôm tơlơi tơnap, phrâo, tañ bơdjơ̆ nao anun amra hmâo hơdôm tơlơi gum pơhiăp pha ra. Yua anun khom kơsem min dơlăm, hmâo jơlan pơsir djơ̆ wot ƀơi anăp hăng sui thun kiăng bruă pơkă kual dưi ngă tui ba glăi bôh tơhnal./.

Siu H’ Prăk: Pơblang