Tơdrun tum păn jar kơmar Cần Giờ, pơkă hlâo pơdŏng ƀơi Kơtuăi Phú Lợi ƀơi bah amăng ia krông Cái Mép – Thị Vải, tơring glông Cần Giờ, abih bang kual tơdrun tum păn năng ai ñu 571 ektar hăng jơlah ia năng ai ñu 477 ektar; Abih bang prăk mă yua kơ rơwang bruă năng ai ñu rơbêh kơ 5 klai dolar Mi. Kual plơi prong tuai čuă ngui hlô̆ nao gah ia rơsĭ Cần Giờ hmâo abih bang 2.870 ektar, abih bang tuh pơplai rơbêh kơ 217.000 klai prăk.

Tơdơi kơ hyu hơduah ĕp, Khua dêh čar ta, ơi Phạm Minh Chính hmâo mông mă bruă hăng khua mua hơdôm Ding jum, Gơnong bruă dêh čar hăng ƀôn prong Hồ Chí Minh kiăng pơsit jơlan gah pơđĭ kyar kual Cần Giờ tañ hăng kơjăp phik. Khua dêh čar ta, ơi Phạm Minh Chính rơkâo ƀôn prong Hồ Chí Minh čih pơkra tañ kual pơkă pơđĭ kyar ƀôn prong; pơhrua nao, ngă giong kual pơkă pơđĭ kyar tơring glông Cần Giờ, dŏng amăng kual pơkă ƀôn prong. Amăng anun, hmâo kual plơi prong hlô̆ nao gah ia rơsĭ Cần Giờ hăng hơdôm rơwang bruă pơkon. Khua dêh čar rơkâo kual pơkă pơđĭ kyar tơring glông Cần Giờ hăng hrom hăng kual hlô̆ nao gah ia rơsĭ Cần Giờ lăi ha jăn khom pơsir, hơkrŭ glăi hăng djru gum, ngă plai ƀiă gun ƀơi jơlan nao rai, anih anom dô̆ hơdip hăng sang anô̆ kơ mơnuih ƀôn sang kual krah ƀôn prong Hồ Chí Minh./.