VOV4.Jarai - Čơtlăm anai lơ 26/7, Khua dêh čar ta ơi Phạm Minh Chính mă bruă hăng hơdôm bôh anom pơčrang pơsit ADN tơlang tơleh ling tơhan pơsăn drơi dô̆ kơƀah tơlơi pơhing hmâo Anom bruă apăn bruă phiăn gah ia jrao ling tơhan, Ding jum khul ling tơhan dêh čar ta; Anom bruă pơsit gah ia jrao lŏn ia, Ding jum ia jrao dêh čar hăng Anom hơdră phrâo sinh học, Anom kơsem min bôh thâo phrâo hăng hơdră phrâo măi mok Việt Nam. Amăng mông mă bruă Khua dêh čar ta ơi Phạm Minh Chính lăi pơthâo tơlơi ñu hmư̆ ol kơdol pran jua buă, ƀuh na nao kơ tơlơi mơ-ak mơng sa čô Amĭ Việt Nam Sông kơtang ƀơi Nghệ An lom dưi ĕp ƀuh tơlang tơleh mơng sa čô mơnuih tơdơi 51 thun pơsăn drơi; ăt kah hăng tơlơi čang rơmang dô̆ tơguan mơng pô amĭ hlâo kơ sa čô ană dong mơng ñu ăt akă ĕp ƀuh mơn tơlang tơleh. Blah ngă rơgao sui laih samơ̆ pran jua hning rơngôt ăt dô̆ na nao mơn, biă ñu hăng hơdôm bôh sang anô̆ hmâo ling tơhan pơsăn drơi; hơdôm rơtuh rơbâo čô ling tơhan pơsăn drơi akă dưi pơsit tơlơi pơhing lăi nao hơdôm klăk čô dô̆ hơning hơngôt, dô̆ pơmin mơng hơdôm mơnuih dô̆ hơdip.

Khua dêh čar hrom hăng khua pơ ala kơ hơdôm Ding jum, gơnong bruă jao bôh tơhnal pơsit ADN kơ 12 bôh sang anô̆ ling tơhan pơsăn drơi

Khua dêh čar ta pơsit, Ping gah, Kơnuk kơna hăng mơnuih ƀôn sang ta đing nao truh bruă ling tơhan rơka ruă, pơsăn drơi kiăng ngă plai ƀiă ruă pran jua anun hăng hơdôm bruă mă sit nik, amăng anun hmâo bruă pơtrut tañ rơnoh bruă hăng bôh tơhnal bruă hyu hơduah ĕp, tum pơƀut hăng pơsit anăn păn tơlang tơleh dô̆ kơƀah tơlơi lăi nao. Amăng mông mă bruă,  Khua dêh čar ta ơi Phạm Minh Chính hmâo lăng laih mông ngă lơphet lăi pơthâo bôh tơhnal pơsit ADN ƀing ling tơhan pơsăn drơi; hrom hăng khua pơ ala hơdôm Ding jum, gơnong bruă jao bôh tơhnal pơsit ADN kơ 12 bôh sang anô̆ ling tơhan pơsăn drơi; jao hră pơkrem prăk nua ñu 10 klăk prăk sa pok hră hăng gơnam tam kơ hơdôm bôh sang anô̆ ling tơhan pơsăn drơi./.

Siu H’ Prăk: Pơblang