VOV4.Jarai - Čơtlăm lơ 12/6, Khua dêh čar ta ơi Phạm Minh Chính mă bruă hăng Grŭp apăn bruă Ping gah tơring čar Bắc Giang kơ tơlơi, bôh tơhnal pok pơhai ngă tui Tơlơi pơtrun pơsit Jơnum prong tal 13 mơng Ping gah hăng Tơlơi pơtrun pơsit Jơnum tal 19 mơng Ping gah tơring čar Bắc Giang. Tơdơi kơ hmư̆ tơlơi lăi pơthâo glăi kơ tơlơi bơwih ƀong mơnuih mơnam mơng tơring čar, lu khua pơ ala tŭ ư hrom hăng tơlơi lăi pơthâo glăi mơng tơring čar hăng hơdôm tơlơi gum pơhiăp ba tơbiă.

Khua dêh čar ta ơi Phạm Minh Chính mă bruă hăng khu tơring čar Bắc Giang

Klah čun mông jơnum, Khua dêh čar ta ơi Phạm Minh Chính pơsit yôm hơdôm bôh tơhnal mơ̆ Gong gai hăng mơnuih ƀôn sang tơring čar Bắc Giang hmâo laih amăng hơdôm hrơi rơgao. Gah bruă pơsir hơdôm hrơi pơ̆ anăp Khua dêh čar črâo rơđah: Lăi pơthâo abih, pok pơhai ngă tui ba glăi bôh tơhnal Tơlơi pơtrun pơsit Jơnum tal 13 mơng Ping gah hăng Tơlơi pơtrun pơsit Jơnum Ping gah tơring čar; mă yua, ngă tui djơ̆ jơlan gah mơng Ping gah, hơdră bruă tơlơi phiăn mơng Kơnuk kơna hăng tơlơi črâo ba git gai mơng Kơnuk kơna, Khua dêh čar. Đing nao klah čun ƀơƀiă, klah sa rơwang bruă, pơsit tơlơi kiăng lăng nao, ngă tui hơdră klă, hơdră ngă ba glăi bôh tơhnal kiăng pơhư prong dong, pơjing pran lar hyu prong./.

Siu H’ Prăk: Pơblang