VOV4.Jarai - Lơ 8/2, ƀrô djơ̆ tal hơdor glăi 92 thun hrơi pơdŏng Ping gah Cộng sản Việt Nam hăng pơwot glăi mă bruă tơdơi kơ tal pơdơi Tết tui phiăn juăt Nhâm Dần 2022, Khua dêh čar ta, ơi Phạm Minh Chính nao čuă hăng hơ-ư̆č hmưi Tết mơnuih apăn bruă, mơnuih mă bruă Sang prăk Kơnuk kơna Việt Nam hăng gơnong bruă Sang prăk. Thun 2021 Sang prăk Kơnuk kơna Việt Nam hmâo mă yua laih hơdră bruă pơhrư̆i prăk dŏng hnưh, pơkra glăi hrơi tla hnưh, pơhrŏ hăng ƀu mă kơmlai. Năng ai ñu 600.000 čô mơnuih hăng mrô prăk čan rơbêh kơ 280.000 klai prăk dưi pơkra glăi hrơi tla hnưh; giăm hmâo 2 klăk čô mơnuih hăng mrô prăk čan giăm truh kơ 4 klăk klai prăk dưi pơhrŏ trun hăng ƀu mă kơmlai; hrŏ trun, ƀu mă kơmlai rơbêh kơ 2.500 klai prăk hăng anom mă yua mơnuih mă bruă, mơnuih mă bruă tui Sang prăk gah hơdră bruă mơnuih mơnam... Thun 2022, pơkă lăng hlâo bruă bơwih ƀong rŏng lŏn tơnah hăng amăng lŏn ia ta tơnap dong hăng ƀu thâo him lăng ôh yua kơ bơbeč mơng klin Covid-19. Khua dêh čar ta rơkâo gơnong bruă Sang prăk git gai gơgrong hlâo, pơplih tañ, ha amăng plĕ hơdôm jơlan gah hơdră bruă prăk kak, pok pơhai ba glăi bôh tơhnal hơdôm jơlan gah djru hơkrŭ glăi, pơđĭ kyar bơwih ƀong, djru ngă gal kơ mơnuih ƀôn sang hăng anom bơwih ƀong dưi tŭ mă gêh gal ngăn rơnoh sang prăk kiăng hơkrŭ glăi hăng pơđĭ kyar bơwih ƀong huă, sĭ mơdrô./.

Siu H’ Prăk: Pơblang