VOV4.Jarai - Mơguah lơ 24/7, amăng jơlan hơdră nao čuă hăng mă bruă ƀơi tơring čar Nghệ An, Khua dêh čar ta ơi Phạm Minh Chính hăng grŭp hyu mă bruă nao čuă, mă bruă hăng Ƀirô pơtrun bruă Khul ling tơhan Quân khu 4. Pơhiăp ƀơi anai, Khua dêh čar ta ơi Phạm Minh Chính lăi rơđah, “Ƀu hmâo quân khu hơpă hmâo lu pơsat kah hăng quân khu 4, hmâo lu mơnuih rơbuh đih ƀơi kual lŏn mơng Quân khu 4 khom ngă klă dong bruă hơdor tơngiă, tla pran, ngă gal brơi klă hloh dong kơ neh wa, ling tơhan đơ đam dêh čar ta ngă tui hơdôm bruă mă hơdor tơngiă kơ mơnuih djru ngă hơkrŭ đưm, sang anô̆ gah hơdră bruă, nao čuă hơdôm bôh pơsat, tuĭ ñang, hơdor glăi ƀing ling tơhan pơsăn drơi”.

Khua dêh čar mă bruă hăng Ƀirô pơtrun bruă Quân khu 4

Amăng bruă rơnuk blah ayăt Prang, ayăt Mi hăng pơgang Lŏn ia, anih anom Quân khu hmâo 198.659 čô ling tơhan pơsăn drơi, 113.597 čô ling tơhan rơka ruă, 12.316 čô Amĭ Việt Nam sông kơtang, 51.286 čô mơnuih bơdjơ̆ nao jrao dioxin./.

Siu H’ Prăk: Pơblang

Tlam lơ 24/7, Khua dêh čar ta ơi Phạm Minh Chính mă bruă hăng Khua mua git gai ping gah tơring čar Nghệ An kơ pok pơhai bruă mă, boh tơhnal ngă tui Hră pơtrun jơnum ruah khua ping gah dêh čar tal XIII hăng Hră pơtrun mơ̆ng ping gah tơring čar tal XIX, rơwang bruă thun 2020-2025. Tui hăng hră lăi pơthâo mơ̆ng tơring čar Nghệ An, 6 blan akŏ thun 2022, rơnoh gơnam tam pơhrui glăi rơbêh 8,44% dong tal dua amăng kual kơdư Tong krah, dong tal 18/63 boh tơring čar, ƀôn prong. Kual sĭ mơdrô hơmâo rŭ glăi kơtang biă mă, him lăng đĭ tui 9,22%.

Ƀơi mông mă bruă, khua mua tơring čar Nghệ An rơkâo hăng Kơnuk kơna, Khua dêh čar kơ bruă pơkă hnong glăi anih čuk pơkra tơdron rơdêh por jar kmar ƀơi Vinh kiăng truh thun 2030 amra hơmâo mơ̆ng 8 klăk truh 12 klăk wơ̆t tuai nao rai sa thun; rơkâo ĕp prăk pok pơhai pơkra jơlan rơdêh đuăi hmar Viêng Chăn-Hà Nội; rơkâo khua dêh čar hăng djop ding jum anom bruă djru prăk duh glăi djơ̆ gơnam mơnuih ƀôn sang lơ̆m čuk pơkra jơlan, pok prong jơlan mrô 1 črăn găn nao pơ dêh čar Nghệ An…

Khua dêh čar mă bruă hăng Khua mua ping gah tơring čar Nghệ An

Tơdơi kơ hmư̆ tơlơi pơčrông sai, pơhiăp klah čun amăng mông jơnum, ơi Phạm Minh Chính Khua dêh čar lăi rơđah, tơring čar kiăng ĕp glăi hơdôm rơnoh prăk hơmâo ƀiă, ruah mă hơdră phun, pok pơhai sa hnong, bruă hơget giong bruă anun. Jak iâu tuh pơ alin pơblih phrâo hơdră mă bruă, samơ̆ aka ƀu hơmâo boh tŭ yua đơi ôh, aka ƀu hơmâo anom bruă sĭ mơdrô tuh pơ alin…Pơ anăp adih, Nghệ An kiăng pơblih tơlơi pơmin, hơdră mă bruă, anŏ gêh găl, pơhno nao rai, pơtum lu bruă mă amăng mơnuih mơnam, mơnuih ƀôn sang djru hrom pơđĭ kyar.

Nay Jek: Pơblang