Anai lĕ sa bruă bơkơtuai dưi WEF pơphun amăng rơwang Jơnum, kiăng lăi pơthâo tơlơi găn rơgao mơ̆ng Việt Nam kah hăng sa gru hơkrŭ glăi bơwih ƀong hăng glăk pơtrut kơtang pơplih hơdră đĭ kyar, pơjing tơhnal pioh lăi pơthâo nao rai hơdôm jơlan gah pơsit, hơdră bruă hăng anih anom mă yua prăk kơ bruă hăng sĭ mơdrô ƀơi Việt Nam. Pơhiăp phun amăng mông Jơnum, Khua dêh čar ta, ơi Phạm Minh Chính lăi pơthâo tơlơi pơhing kơ pơđĭ kyar bơwih ƀong - mơnuih mơnam Việt Nam, lăi rơđah lĕ bruă bơwih ƀong hmâo rơnoh pok pơhư prong, khă amăng hơdôm hrơi tơnap tap, djă kơjăp hơđong bruă bơwih ƀong prong, wai lăng nua gơnam tam hăng pơhlôm kơjăp anô̆ bơkơnar prong, pơtrut pơđĭ kyar, hơkrŭ đĭ kơjăp bruă pơgang rơnuk rơnua lŏn ia, mơ-ak klă, hơđong kơ pơđĭ kyar. Việt Nam glăk pơplih phrâo kơtang dong hơdră pơđĭ kyar, dăp glăi bruă bơwih ƀong, pơtrut pơplih phrâo pơčeh phrâo hăng pơplih mrô, pơtrut kơtang pơplih apui yua, pơđĭ kyar bơwih ƀong mơtah, bơwih ƀong sir akô̆ tlôn. Khua dêh čar ta rơkâo WEF hăng ƀing ding kơna gum hrom dong, djru Việt Nam hơdră mă yua măi mok, prăk kak, pơtô juăt mơnuih mă bruă kơjăp, wai lăng bruă rơnuk anai.

Tlam hrơi anun mơ̆n, Khua dêh čar ta ơi Phạm Minh Chính hơmâo tŭ jum ơi Robert H.McCooey Jr, Kơ-iăng Khua anom bruă sĭ mơdrô Group Nasdaq dêh čar Mi. Khua dêh čar bơni kơ tơlơi dong yua mơ̆ng Nasdaq hăng lu sang bruă sĭ mơdrô mơ̆ng Việt Nam, čang rơmang Nasdaq kah pơpha tơlơi pơhing hăng Việt Nam kơ jơlan hơdră yua prăk kăk hăng hơdôm dêh čar pơprong, anăp nao ngă bruă sĭ mơdrô pơblih nao rai, mă yua prăk kăk hrŏm amăng rŏn tơnah; tơlơi pơhing hăng bruă kah pơpha tơlơi thâo thăi pơđĭ kyar pok anih anom sĭ mơdrô amăng dêh čar, ngă hrŏm hăng sang bruă sĭ mơdrô ƀơi Việt Nam.

Kơ-iăng Khua anom bruă Group Nasdaq pơdah rai pran jua mơak mơ̆n ƀuh boh tơhnal rŭ glăi hăng pơđĭ kyar bơwih ƀong huă ƀơi Việt Nam, lăng yôm jơlan hơdră git gai bruă prăk kăk mơ̆ng kơnuk kơna laih anun đăo kơnang kơ anŏ pơđĭ kyar beč bal mơ̆ng lu sang bruă sĭ mơdrô Việt Nam; ƀuăn djru kơ anom bruă sĭ mơdrô mơ̆ng Việt Nam dưi tơbiă hyu bơwih ƀong huă hrŏm amăng rŏng lŏn tơnah. Kơ-iăng khua group Nasdaq čang rơmang Khua dêh čar nao čuă anih anom sĭ hră prăk jing chứng khoán Nasdaq amăng hrơi blan pơ anăp giăm hloh.

Ăt amăng rơwang Jơnum WEF Thiên Tân mơn, čơtlăm lơ 26/6, Khua dêh čar ta, ơi Phạm Minh Chính hmâo tŭ jum Nai prin tha Klaus Schwab, Pô akô̆ pơjing ngă rah Khua git gai WEF hăng lăng hmư̆ mông ngă Lơphet kĭ pơkôl Hră pơ-ar djă pioh gum hrom (MOU) Việt Nam - WEF rơwang 2023-2026. Khua dêh čar ta lăi rơđah Việt Nam amra kiăo tui dong tơhnal pơkă hơđong bơwih ƀong prong hăng pơtrut pơđĭ kyar. Khua dêh čar ta rơkâo WEF gum hrom Việt Nam dong, djru tô nao rai hơdôm bôh anom bơwih ƀong ding kơna WEF, djru Việt Nam ngă pơhưč yua prăk bơwih ƀong prong, biă ñu amăng hơdră mă yua măi mok, pơplih apui yua, pơplih mrô, anom mă yua hăng kơtưn lăi pơthâo nao rai. Khua dêh čar ta ăt rơkâo mơn WEF lăi pơthâo jơlan gah pơđĭ kyar mơ̆ng rŏng lŏn tơnah, lăi pơthâo hơdră djru Việt Nam pơđĭ tui pran bơkơtưn, pơplih bruă mă yua prăk bơwih ƀong, sĭ mơdrô, lăp djơ̆ hăng hơdôm tơlơi pơkă, jơlan gah phrâo./.