VOV4.Jarai - Mơguah lơ 20/1, Khua dêh čar ta ơi Phạm Minh Chính nao pơhmư̆ hăng črâo ba amăng mông Jơnum pok pơhai bruă ia jrao thun 2022 yua kơ Ding jum ia jrao pơphun tui hơdră jơnum ƀơi anăp hăng lăng nao rai mơng ataih hăng 700 bôh anih tô nao rai ƀơi 63 bôh tơring čar, ƀôn prong amăng đơ đam dêh čar ta.

Pơhiăp amăng mông Jơnum, Khua dêh čar ta ơi Phạm Minh Chính lăi rơđah, Gơnong bruă ia jrao hơkrŭ mơtăm hơdôm tơlơi akă gal, tơlơi akă dưi ngă, pơtlaih hơdôm tơlơi gun amăng bruă pơgang, pơgăn klin kah hăng pơsit mă yua jrao, vaccine, pơdŏng hơdôm anih anom rô hyu, sang ia jrao pơjrao klin ruă hăng biă ñu hơdră blơi prăp, pơsir tơpă hơdôm tơlơi ngă soh, đing nao pơgang pơhlôm hlâo tơlơi ƀu klă, hưp ƀong kông ngăn, bôh tŭ yua grŭp; ƀu pioh “tơlơi sat ngă bơdjơ̆ nao abih bang", Pơdŏng khul mơnuih apăn bruă ơi ia jrao, mơnuih mă bruă sit nik hmâo pran gơgrong kơjăp, tơlơi pơhing kơ bruă mă, rơgơi gah bruă jao, ba glăi bôh tơhnal amăng bruă mă. Kơtưn pơtô juăt mơnuih mă bruă gah ia jrao gah pran jua gơgrong hăng pran jua mă bruă./.

Siu H’ Prăk: Pơblang