VOV4.Jarai - Mơguah lơ 20/6, ƀơi kual guai kơplah wah tơring glông Lộc Ninh, tơring čar Bình Phước hăng tơring glông Memot, tơring čar Tbong Khmum, dêh čar Kur; Khua dêh čar Kur ơi Hun Sen hmâo git gai mông ngă lơphet čơkă jum Khua dêh čar ta ơi Phạm Minh Chính hăng Grŭp Khua pơ ala gưl dlông dêh čar Việt Nam nao pơhmư̆ hơdôm bruă mă hơdor glăi bơnah gah Kur.

Pơhiăp amăng mông ngă lơphet, Khua dêh čar Kur sa wot dong pơsit bruă mă mơng Việt Nam jing djơ̆ biă, ƀing ling tơhan gum djru mơng Việt Nam hmâo gum hrom laih hăng Kur amăng bruă tlaih rơngai lŏn ia, pơtlaih brơi mơnuih ƀôn sang Kur tơtlaih mơng rơnuk Pol Pot pơdjai đuh kơnung djuai, hơkrŭ rŭ glăi hăng pơđĭ kyar lŏn ia. Dua Khua dêh čar pơdah pran jua mơ-ak pran gum hrom hơbit, giăng mah mơng hlâo hăng tơlơi gum hrom abih bang klă hiam kơplah wah Việt Nam hăng Kur dưi hơkrŭ đĭ hăng pơđĭ kyar amăng lu bruă mă, ba glăi bôh tŭ yua sit nik kơ mơnuih ƀôn sang dua bôh dêh čar, djru yôm phăn kơ tơlơi rơnuk rơnua, hơđong, pơđĭ kyar amăng kual hăng rŏng lŏn tơnah. Dua Khua dêh čar pơsit lăng yôm tơlơi rô nao rai “Ƀôn lan jê̆ giăm klă hiam, giăng mah mơng hlâo, gum hrom abih bang, kơjăp phik sui thun” yôm phăn kơplah wah dua djuai ania./.

Siu H’ Prăk: Pơblang