VOV4.Jarai - Mơguah lơ 5/9, amăng tơlơi dik dak mơng hrơi jơnum ngui nao sang hră, Khua dêh čar ta ơi Phạm Minh Chính mơ-ĭt truh ƀing nai pơtô čơđai, mơnuih apăn bruă, mơnuih mă bruă gah gơnong bruă pơtô pơhrăm hrom hăng ƀing čơđai sang hră đơ đam dêh čar ta hăng Sang hră gưl sa mơnuih ƀôn sang Đoàn Thị Điểm tơlơi tơña bla mơ-ak klă hăng tơlơi hơ-ư̆č hmưi thun hrăm phrâo klă hiam hloh.

Khua dêh čar čang rơmang amăng hơdôm hrơi nao sang hră ƀing čơđai amra dưi hrăm hơdôm tơlơi hrăm kơ pran jua hơdor tơngiă hăng tơlơi khăp plơi pla, lŏn ia. Thâo tơngia kơ amĭ ama, ơi yă, nai pơtô čơđai hmâo hrơi mlăm abih pran jua bơwih brơi kơ pô. Ƀing čơđai amra dưi hrăm hơdôm tơlơi hrăm kơ tơlơi gir run, hơdip hmâo tơlơi pơmin prong hăng djơ̆, biă ñu mơng hơdôm gru rơđah amăng gru grua djuai ania. Hăng hơdôm ding jum, gơnong bruă, biă ñu Ding jum pơtô pơhrăm khom đing nao pơsir amăng ƀrư̆ hơdôm tơlơi dô̆ glăi, akă dưi ngă hăng hơdôm tơlơi akă gal phrâo hmâo. Bruă mă ƀơi anăp khom tañ pơsir 3 tơlơi kơƀah, anun lĕ kơƀah nai pơtô – kơƀah anih hrăm – kơƀah hơdrôm hră hrăm. Ngă tui bruă tlâ̆o pơgang klin ruă djop tum, hmâo jơlan rơđah, tŭ yua kiăng ƀing čơđai suaih pral nao sang hră, amĭ ama hơđong bruă mă, nai pơtô čơđai hơđong pran jua pơtô pơblang./.

Siu H’ Prăk: Pơblang