VOV4.Jarai - Mơguah lơ 18/4, Khua dêh čar ta ơi Phạm Minh Chính hmâo nao čuă, pơsur pran jua mơnuih nao pơplông, mơnuih pơhrăm bruă pơplông hăng pel ĕp bruă pơphun SEA Games 31 ƀơi Anom pơhrăm bơkơjăp drơi jăn dêh čar ta ƀơi Hà Nội hăng Anih pơplông bơkơjăp drơi jăn amăng sang Mỹ Đình, Tơdron đă bôh lông Lŏn ia Mỹ Đình. Khul mơnuih mă bruă, mơnuih pơhrăm, mơnuih bơkơjăp drơi jăn Anom amra gir run pơplông, pơsit pran prong hmâo tơhnal dưi ba glăi 100 bôh miđai ƀơi SEA Games tal anai.

Ƀơi mông bưp ƀô̆ mơta, Khua dêh čar ta ơi Phạm Minh Chính čang rơmang ƀing pơplông, pơhrăm bruă pơplông, hơdôm grŭp pơplông hăng grŭp bơkơjăp drơi jăn dêh čar Việt Nam djă pioh kơjăp dong pran gum hrom hơbit, sa jua, ngă tui hơdôm bôh tơhnal, bôh than rơgao hơdôm rơnuk, gir run yak rơgao hơdôm tơlơi tơnap, tơlơi lông, pơhrăm klă gah pran jua, drơi jăn, tơlơi pơplông prăp lui kiăng hmâo bôh tơhnal klă hloh, dlông hloh amra dưi hmâo mă amăng SEA Games 31. Khua dêh čar lăi rơđah: SEA Games 31 lĕ tơhnal gal hăng tơlơi amuñ kiăng bruă bơkơjăp drơi jăn Việt Nam pơdah pran jua, pran kơtang, hmâo mă bôh than dlông hloh abih bang mơng khul. Anai ăt lĕ tal kiăng dêh čar ta ư-ang, lăi pơhư̆č gru rŭp, ană mơnuih Việt Nam hăng tuai dêh čar tač rơngiao./.

Siu H’ Prăk: Pơblang