Čơtlăm mơmot lơ 11/10, rơdêh por pơgiăng Khua dêh čar ta ơi Phạm Minh Chính hrŏm hăng khua pơ ala gưl dlông dêh čar Việt Nam nao pơhmư̆ mông Jơnum gưl dlông ASEAN tal 44, 45 hăng hơdôm Jơnum gưl dlông bơdjơ̆ nao ƀơi Viêng-chăn, Lao, mơ̆ng lơ 8 truh kơ 11/10/2024 hmâo glăi pơ̆ sang, pơđut truh kih klă hiam. Amăng 4 hrơi Jơnum hmâo giăm truh 20 bruă mă, rơbêh kơ 30 čô khua git gai hơdôm bôh dêh čar ASEAN hăng gum hrom nao pơhmư̆, năng ai ñu 90 mơta hră pơ-ar dưi pel ĕp hăng čih djă pioh.

Hăng hrơi pơkă bruă mă kơpal, na nao amăng 4 hrơi, Khua dêh čar hăng ƀing ding kơna grŭp hmâo gum hrŏm rơbêh kơ 60 bruă mă wot dua bơnah hăng lu bơnah, pơtŏng sit gru rup gơgrong hlâo, klă hăng bruă gơgrong mơ̆ng Việt Nam hrŏm hăng gum hơgôp pơtrut tơlơi rô nao rai mơ̆ng Việt Nam hăng hơdôm bơnah gum hrŏm. Jơnum gưl dlông ASEAN tal 44, 45 hăng hơdôm mông Jơnum bơdjơ̆ nao hmâo truh kih klă hiam, pơđut thun Khua ASEAN 2024 mơng Lao. Khua dêh čar ơi Phạm Minh Chính hmâo laih hơdôm mông bưp hăng Khua dêh čar Lao hăng Khua dêh čar Kur, gum hrŏm lăi rơđah phiăn juăt hăng nua mơ̆ng pran jua gum hrŏm Việt Nam-Lao-Kur; tŭ ư gum hrŏm dong ngă brơi kơ tơlơi gum hrŏm 3 bôh dêh čar jai hrơi jai sit nik hăng ba glăi bôh tơhnal, djơ̆ tui tơlơi kiăng sit nik mơ̆ng 3 bôh dêh čar hăng lăp djơ̆ hăng tơlơi kiăng pơđĭ kyar amăng rơnuk phrâo./.