Amăng mông tŭ jum, Khua dêh čar ta, ơi Phạm Minh Chính pơsit yôm tơlơi rô nao rai klă hiam kơplah wah Việt Nam hăng ala čar California lăi hrŏm hăng ƀôn prong Oakland lăi ha jăn, biă ñu lĕ bruă bơwih ƀong sĭ mơdrô hăng gum hrŏm tơdrun tum păn; lăi rơđah ala čar California lĕ sa amăng hơdôm bơnah gum hrŏm gah ƀôn prong ba jơlan hlâo mơ̆ng Việt Nam hăng giăm truh 100 bôh anom bơwih ƀong mơ̆ng ala čar hmâo tuh pơplai ƀơi Việt Nam, anom bơwih ƀong Việt Nam ăt hmâo laih rơbêh kơ 70 rơwang bruă tuh pơplai ƀơi California.

Khua dêh čar ta, ơi Phạm Minh Chính rơkâo Khua bôn prong Oakland hăng ƀing khua apăn bruă ala čar California đing nao dong pơđĭ kyar tơlơi rô nao rai hăng Việt Nam, biă ñu gah bruă bơwih ƀong, sĭ mơdrô, tuh pơplai hăng bơkơtuai mơnuih ƀôn sang, jing pô tô nao rai kơplah wah Mi hăng Việt Nam lăi hrŏm ăt kah hăng kơplah wah hơdôm anom bơwih ƀong dua bôh dêh čar lăi ha jăn, djru pơtrut hăng hơkrŭ đĭ hloh dong tơlơi rô nao rai Việt Nam hăng Mi./.