VOV4.Jarai - Čơtlăm lơ 15/6, Khua dêh čar ta ơi Phạm Minh Chính tŭ jum Khua anih jưh pơ ala kơ dêh čar Êjip ƀơi dêh čar Việt Nam nao lăi pơthâo. Amăng mông tŭ jum, Khua dêh čar ta pơsit Việt Nam lăng yôm phiăn juăt gum hrom hơbit, giăng mah, gum hrom kơplah wah Việt Nam hăng Êjip. Khua dêh čar ta rơkâo dua bơnah khom gum hrom kơjăp kiăng ngă brơi tơlơi gum hrom lu mơta kơplah wah dua bôh dêh čar nao dơlăm, sit nik hăng ba glăi bôh tŭ yua hluai tui grŭp ba tơbiă jơlan gah kah hăng: kơtưn bưp, bơkơtuai nao rai gah grŭp amăng hơdôm bruă kơđi čar, bơwih ƀong.

Khua dêh čar ta rơkâo dua bơnah kơtưn gum hrom amăng hơdôm bruă đơ đam rŏng lŏn tơnah kah hăng hơdôm bruă bơkơtuai lu bơnah; dŏng yua tơlơi pơmin mơng ASEAN hăng Việt Nam kơ tơlơi Ia Rơsĭ Ngŏ; pơtrut gum hrom rơnuk rơnua – pơgang lŏn ia hăng gum hrom khul pơgang rơnuk rơnua mơng Sang gum hơbit djop dêh čar, hluai tui pơpŭ tơlơi dưi hăng bôh tŭ yua djơ̆ phiăn, lăp djơ̆ mơng hơdôm bôh dêh čar, djru kơ tơlơi rơnuk rơnua, hơđong, gum hrom hăng pơđĭ kyar amăng kual hăng ƀơi rŏng lŏn tơnah./.

Siu H’ Prăk: Pơblang