VOV4.Jarai - Ƀơi ƀirô mă bruă Kơnuk kơna, Khua dêh čar ta ơi Phạm Minh Chính tŭ jum Khua anih jưh pơ ala kơ dêh čar Mông Cổ nao lăi pơthâo ƀrô djơ̆ tal čơkă mă bruă ƀơi dêh čar Việt Nam. Amăng mông tŭ jum, Khua dêh čar ta ơi Phạm Minh Chính lăi rơđah, dua bôh dêh čar hmâo tơlơi gum hrom giăng mah mơng hlâo, dŏng yua, djru nao rai tơdruă lom pơdŏng hăng pơđĭ kyar lŏn ia, amăng hơdôm hrơi klin Covid-19 ngă ƀu klă truh ƀơi rŏng lŏn tơnah hăng amăng kual samơ̆ tơlơi rô nao rai dua bôh dêh čar dưi djă pioh dong rơnoh đĭ kyar.

Khua dêh čar ta rơkâo dua bơnah dŏng yua tơdruă dong amăng hơdôm bruă bơkơtuai lu bơnah hăng Mông Cổ dŏng yua dong tơlơi pơmin mơng ASEAN hăng Việt Nam amăng bruă pơsir tơlơi rơnuk rơnua hăng hơdôm tơlơi bơrơsua, pơhlôm rơnuk rơnua, pơhlôm klă gah rơdêh por, jơlan ia rơsĭ. Khua anih jưh pơ ala kơ Mông Cổ tŭ ư prong hăng hơdôm tơlơi ba tơbiă gum hrom mơng Khua dêh čar ta ơi Phạm Minh Chính, lăi rơđah amra gir run gum hrom kơjăp hăng hơdôm bôh ƀirô Việt Nam pơtrut hloh dong bruă giăng mah hăng gum hrom mơng hlâo kơplah wah dua bôh dêh čar, pơtrut gum hrom bơwih ƀong, sĭ mơdrô, tuh pơplai, jơlan nao rai hăng bơkơtuai nao rai mơnuih ƀôn sang./.

Siu H’ Prăk: Pơblang