VOV4.Jarai - Tlam lơ 1/6, Khua dêh čar ơi Phạm Minh Chính tŭ jum ơi Khamphan Phommaphat, Ding kơna Ding jum kơđi čar, Khua anom bruă pel ĕp Kơnuk kơna Lao glăk rai čuă, mă bruă hăng jơnum bơkơtuai kơ bruă ngă hrŏm hăng Anom bruă pel ĕp Kơnuk kơna Việt Nam. Khua dêh čar ơi Phạm Minh Chính lăi pơtong tơlơi rô nao rai Việt Nam - Lao lĕ tơlơi rô nao rai giang mah, yôm phăn, ƀu pơdơi hrưn đĭ hăng pơđĭ kyar; pơsit tong mah amăng rơnuk pơpă tŭ mơn, Việt Nam lêng kơ lăng yôm bruă ngă hrŏm hăng Lao, lêng kơ ngă abih pran jua kiăng pơtrut tơlơi rô nao rai giang mah, ngă hrŏm kjăp, tŭ yua amăng djop mơta bruă.

Khua dêh čar ơi Phạm Minh Chính tŭ jum Khua anom bruă pel ĕp Kơnuk kơna Lao

Khua dêh čar lăng yôm hơdôm boh tơhnal bơkơtuai kơplah wah khua mua mơng anom bruă pel ĕp Kơnuk kơna Lao hăng Việt Nam; pơsit tong Kơnuk kơna Việt Nam pơtrut pơsur hăng ngă gêh gal kiăng dua bơnah kơtưn ngă hrŏm amăng bruă pel ĕp, pơsir kơđi tơlơi hăng bruă pơgang, pơgăn hưp ƀong kông ngă; amra ngă gêh gal djop mơta kiăng anom bruă pel ĕp Kơnuk kơna Việt Nam pơphun hơdôm tal pơtô hrăm brơi ƀing apăn bruă tui tơlơi rơkâo mơng anom bruă pel ĕp dêh čar Lao.

Siu Đoan: Pơblang