VOV4.Jarai - Čơtlăm lơ 26/5, ƀơi ƀirô mă bruă Kơnuk kơna, Khua dêh čar ta ơi Phạm Minh Chính hmâo tŭ jum Nai tha prin Stewart Cole, Khua Anom Pasteur Paris glăk rai čuă, mă bruă ƀơi dêh čar Việt Nam. Amăng mông tŭ jum, Khua dêh čar ta pơsit bruă ia jrao lĕ bruă gum hrom gru grua klă hiam, sa amăng hơdôm gru rơđah djru pơtrut hloh dong tơlơi gum hrom kơplah wah Việt Nam hăng Prang jai hrơi jai pơđĭ kyar.

Anih anom mông tŭ jum

Khua dêh čar ta lăi rơđah, tơlơi rô nao rai gum hrom gru grua kơplah wah Anom Pasteur Prang hăng hơdôm Anom Pasteur ƀơi dêh čar Việt Nam dưi lăng lĕ gru than hăng ăt lĕ gru lăi rơđah amăng gum hrom bruă ia jrao kơplah wah dua bôh dêh čar. Khua dêh čar ta bơni kơ Anom Pasteur hmâo laih hơdôm tơlơi gir run yôm phăn kơ hơdôm bôh Anom Pasteur mơng Việt Nam amăng hơdôm hrơi rơgao, biă ñu lĕ prăk djru kiăng pơđĭ tui bôh thâo kơsem min, lăng tui hăng pơčrang SARS-CoV-2 hăng abih bang rơnoh tuh pơplai rơbêh kơ 10 klai prăk./.

Siu H’ Prăk: Pơblang