Khua dêh čar ta pơtŏng sit, Việt Nam gum hrŏm na nao, abih pran jua djru Lao tui kơ pran pô dưi djru kiăng gum hrŏm yak rơgao tơlơi tơnap, pơđĭ kyar dong. Amăng bruă ia jrao, ƀuh rơđah hloh lĕ hơdôm bruă gum hrŏm amăng pel ĕp, pơjrao tơlơi ruă, pơtô juăt mơnuih mă bruă ia jrao, wai lăng tơlơi klin ruă hăng djru kơtưn wai lăng bruă ia jrao; amăng rơwang klin Covid-19 ngă, hơdôm bruă gum djru vaccine, gơnam tam, măi mok ia jrao, lăi pơthâo tơlơi găn rơgao hăng pơkiăo nao mơnuih juăt bruă hmâo djru laih dua bôh dêh čar amăng ƀrư̆ wai lăng hăng yak rơgao klin ruă ngă.

Pơ̆ anăp anai, Khua dêh čar ta rơkâo dua Ding jum gum hrŏm pơdŏng kơčăo bruă pioh pơplih phrâo, pok pơhai ba glăi bôh tơhnal hơdôm tơlơi pơkôl gưl dlông mơng dua bôh dêh čar; lăi pơthâo nao rai dong tơlơi găn rơgao, biă ñu amăng pơtrut pơplih mrô, pel ĕp pơjrao tơlơi ruă mơng ataih...; djru gum, ngă gal brơi amăng bruă pel ĕp pơjrao tơlơi ruă kơ mơnuih ƀôn sang mơng dêh čar Lao ƀơi hơdôm bôh sang ia jrao mơng Việt Nam; kơtưn bruă pơtô juăt mơnuih mă bruă ia jrao, pok prong dong hơdôm gơnong bruă pơtô pơhrăm lăp djơ̆ hăng tơlơi kiăng ră anai mơng Lao./.