VOV4.Jarai - Čơtlăm lơ 5/4, ƀơi Ƀirô mă bruă Gong gai dêh čar ta, Khua dêh čar ta ơi Phạm Minh Chính tŭ jum Khua Ding jum pơtom hiăp dêh čar Panama Érika Mouynes nao lăi pơthâo ƀrô djơ̆ tal rai čuă sit nik dêh čar Việt Nam mơng lơ 4 – 6/4. Gah bruă rô nao rai dua bôh dêh čar, Khua dêh čar ta ơi Phạm Minh Chính čang rơmang dua bôh dêh čar gum hrom kơjăp dong, ba glăi bôh tơhnal kiăng Panama jing jơlan tô nao rai ngă brơi gơnam tam Việt Nam mut amăng kual Mỹ Latinh, hăng kơđai glăi, Việt Nam lĕ bah amăng pioh gơnam tam Panama mut amăng kual Đông Nam Á. Kiăng tơlơi rô nao rai dua bôh dêh čar jai hrơi jai ba glăi bôh tŭ yua hăng sit nik hloh dong, Khua dêh čar ta ơi Phạm Minh Chính rơkâo Ding jum pơtom hiăp dêh čar hăng hơdôm Ding jum, gơnong bruă dua bôh dêh čar kơtưn pơplih grŭp čuă nao rai hơdôm gưl, bưp gah rơngiao hơdôm mông jơnum jar kơmar, ngă tui hăng pơđĭ tui bôh tơhnal hơdră Hơduah ĕp lăng bruă kơđi čar gưl Kơ-iăng Khua ding jum pơtom hiăp hăng Jơnum min gum hrom lu bruă gah bơwih ƀong, sĭ mơdrô hăng tuh pơplai Việt Nam hăng Panama; pơtrut kơtang bruă gum hrom hơdôm bruă dua bơnah hmâo lu tơhnal gal hăng anô̆ kơtang kah hăng sĭ mơdrô, dŭ pơgiăng gơnam tam găn rơgao ia rơsĭ./.

Siu H’ Prăk: Pơblang