Khua dêh čar ta ơi Phạm Minh Chính bơni hăng pơsit tal 2 rai čuă Việt Nam mơ̆ng ơi Jose Ramos-Horta hăng sa čô Khua mir sir hmâo bôh tŭ yua yôm phăn biă, pơđom pioh črăn jơlan rơbêh kơ 20 thun akô̆ pơjing bruă pơtom hiăp, djru hơkrŭ đĭ pran jua đăo kơnang bruă kơđi čar hăng pran pơtrut phrâo kơ tơlơi rô nao rai dua bôh dêh čar pơ̆ anăp anai.

Dua gơñu ăt tŭ ư mơn kơtưn đĭ pran đăo kơnang bruă kơđi čar hluai tui bơkơtuai, pơbưp gưl dlông hăng hơdôm gưl; pok pơhai ba glăi bôh tơhnal hơdôm tơlơi pơkôl gưl dlông; pơtrut kơtang dong ngă giong rơwang bruă tơlơi phiăn kơ gum hrŏm dua bơnah; mă yua ba glăi bôh tơhnal hơdôm anô̆ gal gum hrŏm prong prin kơplah wah dua bôh dêh čar. Khua dêh čar ta rơkâo dua bơnah tañ pơhrư̆i ƀudah kĭ pơkôl phrâo Hră djă pioh kơ sĭ mơdrô braih, djru pơhlôm hơđong gơnam ƀong huă; pơtrut pơsur Timor Leste đĭ dong bruă blơi mut hơdôm gơnam mơ̆ng Việt Nam lăp djơ̆. Dua bơnah ăt pơkôl dŏng yua dong mơn tơlơi pơmin pơkă phiăn mơ̆ng ASEAN kơ Ia Rơsĭ Ngŏ ăt kah hăng hơdôm tơlơi gir run djă pioh rơnuk rơnua, hơđong, pơhlôm abih bang hăng nao rai mơ-ak klă ƀơi ia rơsĭ, gah rơngit adai ƀơi Ia Rơsĭ Ngŏ, djru mut bruă djă pioh rơnuk rơnua, hơđong hăng pơđĭ kyar amăng kual./.