VOV4.Jarai - Mơguah lơ 20/5, ƀơi Hà Nội, Khua dêh čar ta ơi Phạm Minh Chính tŭ jum Khua git gai pơ ala mơnuih ƀon sang dêh čar Singapore Tan Chuan-Jin glăk rai čuă sit nik dêh čar Việt Nam. Amăng mông bưp, Khua dêh čar ơi Phạm Minh Chính rơkâo dua bơnah pơtrut dong bruă čuă jơmư, pơbưp kơplah wah khua mua hăng djop gưl amăng djop mơta bruă; pok pơhai tŭ yua hơdôm hơdră bruă, tơlơi pơkôl ngă hrŏm dua bơnah, biă mă ñu lĕ Jơnum Khua ding jum pơlir bơwih ƀong huă Việt Nam - Singapore. Khua dêh čar čang rơmang Khua pơ ala mơnuih ƀon sang dêh čar dua bơnah tŏ tui dong yua, ngă gêh gal brơi bruă hơkrŭ glăi hăng pơđĭ kyar bơwih ƀong huă tơdơi kơ abih klin, amăng anun đing nao djop mơta bruă Singapore hơmâo tơlơi dưi hăng Việt Nam glăk kiăng anun lĕ: pơplih pơčeh phrâo, apui lơtrik hơdjă, bơwih ƀong mă yua boh thâo phrâo, hơmâo lu gơnam dong nao sĭ mơdrô amăng rŏng lŏn tơnah.

Khua čô khua ăt pơlăi nao rai hơdôm bruă amăng kual, jar kmar hăng hơdôm bruă dua bơnah đing nao, amăng anun lăi pơtong kual ASEAN kiăng kjăp ngă tui tơlơi pơkă amăng kual ia rơsĭ ngŏ, pơsir hĭ bruă bơrơjah hăng hơdră pơhlôm rơnuk rơnua djơ̆ hăng tơlơi phiăn jar kmar anun lĕ Công ước mơng Sang gum hơbit djop dêh čar kơ tơlơi phiăn kual ia rơsĭ thun 1982 (UNCLOS 1982) hăng tơlơi yôm mơng bruă pơhlôm rơnuk rơnua, rơngai, hơđong amăng kual ia rơsĭ hăng rơngĭt adai ƀơi kual ia rơsĭ Ngŏ.

Siu Đoan: Pơblang