VOV4.Jarai - Čơtlăm lơ 10/3, Khua dêh čar ta ơi Phạm Minh Chính tŭ jum yă Deborah Paul, Khua anih jưh pơ ala kơ dêh čar Canada nao lăi pơthâo ñu pơwot glăi dêh čar. Amăng mông tŭ jum, Khua dêh čar ta ơi Phạm Minh Chính hơ-ư̆č hmưi ñu pơđut bruă mă klă hiam rơwang mă bruă ƀơi dêh čar Việt Nam, pơsit yôm hơdôm tơlơi gum hơgôp klă mơng Khua anih pơ ala hmâo djru ngă brơi bruă gum hrom abih bang Việt Nam hăng Canada pơđĭ kyar jai hrơi jai ba glăi bôh tơhnal, bôh nik ñu abih bang hơdôm bruă. Thun 2021, prăk pơhrui glăi mơng gơnam sĭ mơdrô nao rai dua bơnah hmâo rơbêh kơ 6 klai dolar Mi, đĭ 19% bơhmu hăng thun 2020. Khua dêh čar bơni kơ Kơnuk kơna hăng mơnuih ƀôn sang Canada hmâo djru laih vaccine kơ Việt Nam hluai tui hơdră COVAX, djru Việt Nam ngă juăt pơhlôm pơplih tañ, wai lăng ba glăi bôh tơhnal klin ruă, đăo gơnang pok bah amăng hăng hơkrŭ glăi, pơđĭ kyar bơwih ƀong mơnuih mơnam. Khua dêh čar ta rơkâo dua bôh dêh čar pơtrut gum hrom dong, biă ñu amăng bơwih ƀong – sĭ mơdrô – tuh pơ plai, bŏng glăi hăng klin ruă hăng pơplih ayuh hyiăng, đĭ kyar klă hơdjă, kơjăp, pơtô pơhrăm mơnuih mă bruă kơjăp...

Siu H’ Prăk: Pơblang