VOV4.Jarai - Čơtlăm lơ 17/6, Khua dêh čar ta ơi Phạm Minh Chính git gai mông bưp ƀô̆ mơta mơng Kơmuk kơna hăng Khua mua hơdôm bôh ƀirô čih tơlơi pơhing ƀrô djơ̆ tal hơdor glăi 97 thun Hrơi pioh kơ bruă čih tơlơi pơhing phrâo hơkrŭ Việt Nam (21/6).

Anih pơbưp ƀô̆ mơta

Tơdơi kơ hmư̆ tơlơi gum pơhiăp mơng khua mua hơdôm bôh ƀirô čih tơlơi pơhing phrâo, pơhiăp amăng mông pơbưp, Khua dêh čar ta ơi Phạm Minh Chính lăi rơđah: Bruă čih tơlơi pơhing lĕ jơlan tô nao rai kiăng lăi pơthâo tơlơi pơhing truh mơnuih ƀôn sang tơlơi bơwih ƀong – mơnuih mơnam mơng lŏn ia, lăi nao tơlơi mơnuih mơnam, hơdôm tơlơi klă, thâo ƀuh hơdôm tơlơi bưp ƀong kông ngăn, ngă ƀu klă, ngă khưi khai, hơdôm hơdră bruă lăi nao kiăng pơplih pơkra. Khua dêh čar pơsit, hơdôm tơlơi pơhing anun yôm phăn biă hăng bruă pơplih pơkra mơng Kơnuk kơna, Kơnuk kơna lăng tui, hmư̆ tui tơlơi mơnuih ƀôn sang tui jơlan pôr pơhing kiăng hmâo jơlan gah pơsir djơ̆, hmao tlôn. Pơ ala kơ Kơnuk kơna, Khua dêh čar ta hơ-ư̆č hmưi, bơni tơlơi gum hơgôp mơng bruă pôr pơhing dêh čar ta, djru hrom Ping gah, Kơnuk kơna hmâo lu bôh than yôm phăn./.

Siu H’ Prăk: Pơblang