VOV4.Jarai - Amăng rơwang Jơnum gưl dlông ASEAN hăng Mi ƀơi plơi prong jưh jom Washington, dêh čar Mi, mơmot lơ 12/5, Khua dêh čar ta ơi Phạm Minh Chính hmâo laih bruă bưp hăng Khua mir sir dêh čar Mi ơi Joe Biden ƀơi Ƀirô mă bruă Khua mir sir. Amăng mông bưp, Khua dêh čar ta ơi Phạm Minh Chính hăng Khua mir sir dêh čar Mi ơi Joe Biden hmâo bơkơtuai kơ tơlơi rô nao rai dua bơnah Việt Nam hăng Mi hăng hơdôm tơlơi ƀơi kual, jar kơmar.

Khua dêh čar ta ơi Phạm Minh Chính hăng Khua mir sir dêh čar Mi ơi Joe Biden

Khua dêh čar ta ơi Phạm Minh Chính pơsit yôm tơlơi rô nao rai Việt Nam hăng Mi jing sa tơlơi rô nao rai yôm phăn. Dua bôh dêh čar hmâo yak rơgao laih tơlơi ƀu mơ-ak amăng rơnuk blah ngă, gum hrom tơdruă, pơtrut tơlơi gum hrom abih bang pơđĭ kyar jai hrơi jai sit nik, ba glăi bôh tơhnal amăng djop bruă. Việt Nam čang rơmang Mi djru hăng gum hrom hăng Việt Nam amăng hơdôm bruă mơ̆ Mi hmâo tơlơi dưi prong hăng Việt Nam glăk hmâo tơhnal gal hăng tơlơi kiăng yua kah hăng pơgang pơgăn klin ruă, pơplih mrô, pơplih bruă pơlir hơbit, pơgăn pơplih ayuh hyiăng, pơtô bruă mă kơ mơnuih mă bruă./.

Siu H’ Prăk: Pơblang