VOV4.Jarai - Khua dêh čar ta phrâo pơsit akô̆ bruă pơđĭ kyar gơnong bruă măi mok pơkra hnal kyâu kơjăp, ba glăi bôh tŭ yua rơwang 2021-2030. Tơhnal pơkă akô̆ bruă ba tơbiă truh thun 2025, hnal kyâu sĭ kơ dêh čar tač rơngiao hmâo 20 klai dolar Mi, ba dêh čar Việt Nam dŏng amăng grŭp hơdôm bôh dêh čar ba jơlan hlâo ƀơi rŏng lŏn tơnah gah pla pơkra, sĭ hnal kyâu kơ dêh čar tač rơngiao. Truh thun 2030, gơnong bruă măi mok pơkra hnal kyâu jing gơnong bruă bơwih ƀong yôm phăn; pơdŏng, pơđĭ kyar anăn păn gơnam mă mơng hnal kyâu Việt Nam hmâo pran đăo gơnang ƀơi anih sĭ mơdrô amăng dêh čar ta hăng pơ̆ dêh čar tač rơngiao. abih bang hnal kyâu, gơnam pơkra mơng hnal kyâu sĭ kơ dêh čar tač rơngiao hăng blơi yua amăng dêh čar dưi mă yua mơng kyâu pơtâo djơ̆ phiăn, kyâu hmâo hră pơ-ar wai lăng kơjăp phik. Kiăng dưi ngă tui tơhnal pơkă anai, amăng 5 thun pơ̆ anăp amra jing 5 kual đang kyâu mă yua hơdră phrâo rơnuk anai, ngă pơhư̆č tuh pơplai mơng hơdôm bôh anom bơwih ƀong pơkra hnal kyâu hăng anom pơkra gơnam djru gah tlôn. Pơđĭ kyar, pok prong hơdôm kual, ƀut sang măi pơkra hnal kyâu ƀơi hơdôm anih anom hmâo tơhnal gal, anô̆ gal pơđĭ kyar./.

Siu H’ Prăk: Pơblang