VOV4.Jarai - Lăng glăi tơlơi lăi pơthâo glăi mơng Plăng pơhing điện tử Kơnuk kơna kơ bôh tơhnal bơkơtuai “Hơdôm jơlan pơsir kiăng hơkrŭ tơlơi kơƀah ia jrao gun, gơnam mă yua gah ia jrao”, Khua dêh čar ta ơi Phạm Minh Chính hmâo tơlơi gum pơhiăp črâo ba tui anai: Khua Ding jum ia jrao kơsem min, hơduah ĕp lăng tơlơi gum pơhiăp mơng ƀing juăt bruă ƀơi tơlơi lăi pơthâo glăi bôh tơhnal bruă bơkơtuai kiăng črâo ba ngă tui hơdôm jơlan gah djơ̆, hmao tlôn hơkrŭ pơsir tơlơi kơƀah jrao, gơnam mă yua gah ia jrao ƀơi hơdôm anih anom pel ĕp pơjrao tơlơi ruă. Kiăng pơsir tơlơi kơƀah jrao, gơnam mă yua hăng măi mok  gah ia jrao, blung hlâo khom hmâo tơlơi pơsit rơnoh, tơlơi kơƀah hiưm ñu ƀơi rim gưl, Kơnuk kơna, glông tơring čar, tơring glông, anom ia jrao, pơsit bôh than ba truh kơƀah jrao mơng rim anom. Ding jum ia jrao pơplih pơkra hăng tañ mă yua hơdôm tơlơi pơtrun bơdjơ̆ nao pơtô brơi juă nua, tơlơi pơtrun kơ ngă hră blơi jrao, nua jrao, pơtô brơi blơi prăp măi mok mă yua, amăng anun hmâo gơnam mă yua gah ia jrao./.

Siu H’ Prăk: Pơblang