VOV4.Jarai - Čơtlăm lơ 9/9, Khua dêh čar ơi Phạm Minh Chính hmâo tŭ jum Khua Ding jum, Khua Anom bruă Khua dêh čar Lao Alounxai Sounnalath rai čuă, mă bruă ƀơi dêh čar Việt Nam hăng git gai Jơnum bơkơtuai, lăi pơthâo tơlơi găn rơgao hăng Anom bruă Kơnuk kơna Việt Nam amăng bruă pơphô brơi ruah mă djru Kơnuk kơna, Khua dêh čar.

Amăng mông tŭ jum, Khua dêh čar ta rơkâo pơ̆ anăp anai, dua bôh anom pok pơhai ba glăi bôh tơhnal Hră čih djă hơdor pioh Kơčăo bruă gum hrom rơwang 2022-2023; gum hrom lăi pơthâo dong, bơkơtuai nao rai tơlơi găn rơgao amăng pơsir bruă mă hăng pok pơhai ba glăi bôh tơhnal hơdôm rơwang bruă gum hrom, jai hrơi jai pơđĭ tui hloh anô̆ kơjăp bruă pơphô brơi ruah mă djru Kơnuk kơna, Khua dêh čar dua bôh dêh čar git gai. Khua Ding jum Khua Anom bruă Khua dêh čar Lao pơsit dêh čar Lao lăng yôm, čang rơmang djă pioh, bư̆ bôr hăng pơđĭ kyar tơlơi rô nao rai giăng mah krên dên hăng gum hrom hơbit pha ra kơplah wah Lao hăng Việt Nam, brơi thâo amra pok pơhai klă hơdôm bruă črâo ba, pơkôl mơng khua git gai gưl dlông dua bôh dêh čar, djru pơtrut tơlơi gum hrom hơbit giăng mah pha ra mơ̆ khua git gai Ping gah, Kơnuk kơna hăng mơnuih ƀôn sang dua bôh dêh čar hmâo bư̆ bôr jai hrơi jai nao dơlăm, sit nik hăng ba glăi bôh tơhnal amăng abih bang hơdôm mơta bruă, ba glăi bôh tŭ yua kơ mơnuih ƀôn sang dua bôh dêh čar./.

Siu H’ Prăk: Pơblang