VOV4.Jarai - Čơtlăm lơ 14/9, Khua dêh čar ta ơi Phạm Minh Chính tŭ jum ơi Hayashi Nobumitsu, Khua Sang prăk gum hrom jar kơmar dêh čar Japan rai čuă hăng mă bruă ƀơi dêh čar Việt Nam. Khua dêh čar ta pơsit Việt Nam lăng Japan lĕ bơnah gum hrom yôm phăn ba jơlan hlâo, sui thun, dŏng yua Japan gum hơgôp klă kơ tơlơi rơnuk rơnua hăng pơđĭ kyar mơng kual hăng ƀơi rŏng lŏn tơnah.

Khua dêh čar rơkâo Khua Sang prăk lăng ba, gum hrom dong hăng hơdôm ƀirô mă bruă mơng Japan pơtrut kơtang, pơhư prong gum hrom hơkrŭ bơwih ƀong tơdơi kơ Covid-19 ngă, djru Việt Nam pơdŏng bruă bơwih ƀong rơngai, gơgrong pô hăng klă, gơgrong hlâo mut hrom jar kơmar dơlăm hloh, sit nik hloh, ba glăi bôh tŭ yua hloh; pơđĭ kyar apui yua pơkra glăi. Khua Sang prăk hmâo tŭ ư hăng lu tơlơi ba tơbiă gum hrom mơng Khua dêh čar ta, amăng anun hmâo tơlơi bơdjơ̆ nao rơwang bruă djŏng ia jâu Nghi Sơn; pơsit yôm bôh thâo git gai, črâo ba, pơpha bruă mơng Kơnuk kơna Việt Nam, Việt Nam hmâo djă kơjăp hơđong bơwih ƀong prong amăng mông rŏng lŏn tơnah hmâo lu tơlơi pơplih./.

Siu H’ Prăk: Pơblang