Khua dêh čar ơi Phạm Minh Chính mơ-it hiăp tơña bla, juh alum sang anŏ hơmâo tơlơi răm ƀăm truh.Amăng hơdôm hrơi rơgao, ƀơi hơdôm boh tơring čar pơ kual gah kơdư dêh čar hăng kual Dap Kơdư hơmâo hơjan prong, ngă lŏn tơhroh mơ̆ng čư̆, ia tơluh kơtang. Mơguah sing bring lơ 29/6, hơmâo tơlơi truh lŏn tơhlŏm ƀơi Đà Lạt, tơring čar Lâm Đồng dua čô mơnuih lŏn dor hĭ, hơdôm čô mơnuih pơkŏn rơka rơkač, sang mơnuih ƀôn sang giăm anun răm rai.

Kiăng tañ rŭ glăi anŏ răm ƀăm tơdơi kơ lŏn tơhlŏm anun, pơgang tơlơi rơnuk rơnua kơ mơnuih ƀôn sang hăng rơnăk jơlan glông nao rai amăng bơyan hơjan hlim, Khua dêh čar pơtrun hiăp Ding jum Đang hmua hăng Pơđĭ kyar plơi pla, Ding jum kông ngăn lŏn mơnai hăng Ayuh hyiăng, Ding jum Man pơdong, Ding jum Jơlan glông hăng Pơdŭ pơgiăng, Ding jum Pơtô hăng Pơjuăt, Ding jum Sĭ mơdrô, Ding jum ling tơhan, Ding jum kông an, Khua Jơnum min mơnuih ƀôn sang djop tơring čar, ƀôn prong, Khul khua mua git gai bruă pơhlôm pơgang tơlơi truh dêh čar pơtum git gai, pơčrâo bruă pơgang hăng ngă pơhrŏ tơlơi truh yua lŏn adai ngă.