VOV4.Jarai - Tlam lơ 18/3, ƀơi sang bruă Kơnuk kơna, Khua dêh čar ơi Phạm Minh Chính tŭ jum ơi Thomas Vallely, Khua jơlan hơdră Việt Nam ƀơi sang hră gưl prong Harvard hăng ƀing kơhnâo mơng Sang hră gưl prong Fulbright Việt Nam. Ƀơi mông bưp, Khua dêh čar ơi Phạm Minh Chính lăng yôm tơlơi gum djru prong mơng ơi Thomas Vallely amăng bruă akŏ pơdong sang hră gưl prong Fulbright Việt Nam hăng bơni hơ-ơč kơ Sang hră gưl prong Fulbright hơmâo lu tơlơi dưi ngă prong kơ bruă pơtô pơjuăt hăng kơsem min boh thâo. Amăng rơnuk anai, Kơnuk kơna Việt Nam glăk pơtrut hơdră rŭ glăi, pơđĭ kyar bơwih ƀong huă - mơnuih mơnam, pơƀut čih pơkra tơlơi phiăn kiăng dưi pơđĭ kyar hơđong kơjăp hăng sui thun. Amăng anun, pơsit pơtrut tui tơlơi hơmâo mơng ană mơnuih; ană mơnuih yơh phun, jing tơlơi gơñăm nao mơng tơlơi đĭ kyar. Laih dong, pơsit ngă tŭ yua hơdôm bruă pơtô pơjuăt hrŏm hăng boh thâo phrâo jing hơdră ngă bruă yôm phun, jing tơlơi pơtrut đĭ phun đah mơng pơđĭ kyar lŏn ia.

Siu H’Mai: Pơblang