Ƀơi mông bưp, Khua dêh čar ơi Phạm Minh Chính hok mơ-ak kơ tal rai čuă Việt Nam blung a mơng Khua ding jum Alexander Schallenberg; lăng tôm boh than ba glăi mơng mông bơkơtuai hăng Khua ding jum pơtom hiăp ơi Bùi Thanh Sơn hăng Jơnum ngă hrŏm Việt Nam - Áo hơmâo lu anom bơwih ƀong mơng dua bơnah pơhmư̆ amăng mơguah lơ 17/4/2023; đăo gơnang tal rai cuă anai amra ba tơlơi rô nao rai ngă hrŏm kơplah wah Việt Nam hăng Áo jai hrơi klă hiam, pơđĭ kyar hloh amăng djŏp bruă.

Khua dêh čar ơi Phạm Minh Chính pơsit, Việt Nam lêng kơ lăng yôm hăng čang rơmang pơtrut tui tơlơi rô nao rai ngă hrŏm hăng dêh čar Áo, sa boh dêh čar ding kơna yôm mơng Khul pơlir hơbit kual Mi Kô̆ (EU). Khua dêh čar ta lăi dua bơnah kiăng pok pơhai hơdôm hơdră djru pơtrut tui tơlơi ngă hrŏm amăng hơdôm bruă mơ̆ dua bơnah dưi ngă hloh hăng kiăng yua hloh kah hăng boh thâo măi mok, anih anom, sang dŏ, mơnuih mă bruă, pơtô bruă, pơplih yua mrô, bơwih ƀong lok nao lok rai, pơplih mơtah mơda....