VOV4.Jarai - Tlam tom brơi lơ 11/7, ƀơi sang bruă Kơnuk kơna, Khua dêh čar ơi Phạm Minh Chính hơmâo bưp, pơhiăp tom Khua ding jum pơtom hiăp, Sĭ mơdrô hăng Tơlơi đăo Argentina, ơi Santiago Andres Cafiero ƀrô hrơi ñu rai čuă sit nik dêh čar Việt Nam mơng lơ 9 truh 11/7. Ƀơi mông bưp, Khua dêh čar ta kiăng dua bơnah ngă hrŏm kơjăp pơtrut tui tơlơi hyu čuă jơmư nao rai, pơbưp khua mua prong, čih pơkra akŏ bruă pioh ngă lơphet 50 thun akŏ pơdong tơlơi rô nao rai kơplah wah dua bơnah amăng thun 2023; ngă hrŏm, dong yua na nao ƀơi hơdôm khul grup jar kmar, jơnum lu bơnah, gum pơgôp prong pơsir hĭ hơdôm tơlơi hơmâo ƀơi kual hăng ƀơi rŏng lŏn tơnah.

Khua ding jum pơtom hiăp dêh čar Argentina kiăng ba tơlơi ngă hrŏm abih bang hăng Việt Nam pơđĭ tui hloh. Khua ding jum ƀuăn amra pơtrut hơdôm Ding jum anom bruă gah dêh čar Argentina ngă hrŏm hăng Việt Nam, ba tơlơi rô nao rai ngă hrŏm amăng lu bruă kơplah wah Việt Nam hăng Argentina jai hrơi sit nik, tŭ yua; anăp na0 tơlơi rô nao rai ngă hrŏm prong gah apui yua, bruă hmua yua tơlơi klă hiam kơ mơnuih ƀon sang dua bơnah.

Siu H’Mai: Pơblang