VOV4.Jarai - Tlam lơ 5/9, ƀơi anom bruă Kơnuk kơna, Khua dêh čar ơi Phạm Minh Chính hơmâo tŭ jum Khua djru bruă mơng Khua mir sir Mi kơ Ayuh hyiăng John Kerry nao čuă hăng mă bruă ƀơi Việt Nam. Ƀơi mông tŭ jum, dua bơnah tŭ ư pơđĭ tui tơlơi rô nao rai ngă gŏp amăng abih bang bruă kơplah wah Việt Nam - Mi jai hrơi sit nik, dlăm hloh, hơđong kơjăp tui tơlơi thâo pơpŭ kơ tơlơi rơngai, tơlơi dưi wai lăng lŏn ia hăng tơlơi phiăn mơng dua bơnah, gir pơđĭ tui tơlơi jê̆ giăm phrâo lơ̆m hơmâo tơlơi gêh gal. khua dêh čar ơi Phạm Minh Chính hok mơ-ak kơ dêh čar Mi pơtrut tui tơlơi ngă hrŏm hăng hơdôm boh dêh čar, mơng anun gum djru klă hloh kơ tơlơi rơngai, hơđong kơjăp hăng ngă hrŏm pơđĭ kyar amăng kual.

Khua dêh čar tŭ jum Khua djru bruă mơng Khua mir sir Mi kơ pơplih ayuh hyiăng.

Việt Nam čang rơmang dêh čar Mi amra ngă tui djơ̆ tơlơi ƀuăn dong yua tơlơi gơgrong bruă mơng ASEAN, tơlơi ngă hrŏm yôm ASEAN - Mi hăng tơlơi ngă hrŏm Mê Kông - Mi. Khua djru bruă Kerry lăi glăi dong, dêh čar Mi lêng kơ lăng yôm tơlơi ngă hrŏm abih bang hăng Việt Nam, dong yua Việt Nam gơgrong bruă amăng kual laih anun pơgang glăi hơdôm tơlơi truh hơmâo ƀơi jar kmar, amăng anun hơmâo tơlơi pơplih ayuh hyiăng.

Siu H’Mai: Pơblang