Ƀơi mông bưp, Khua dêh čar lăi, Việt Nam leng lăng yom hăng čang rơmang ƀu pơdơi đĭ kyar rô nao rai hăng ngă gŏp hlom bom hăng Nga. Khua dêh čar lăng yom biă bruă Grup bơwih ƀong đĭ kyar tañ hăng hmao ngă bruă ngă hơdôm grup bơwih ƀong, anom mơdrô prong mơ̆ng Việt Nam, hơdôm anom mơdrô dua bơnah ngă hrŏm kjăp, tŭ yua hloh dong đah mơ̆ng dưi ngă hơdôm tơlơi kĭ pơkôl mơ̆ng khua mua.

Bơni kơ Khua dêh čar ơi Phạm Minh Chính pioh mông tŭ jum, ơi Vladimir Petrovich Evtushenkov brơi thâo AFK Sistema jing grup bơwih ƀong mơnuih ƀôn sang ngă pô prong hloh mơ̆ng dêh čar Nga, hăng năng ai 300 rơbâo čô mơnuih mă bruă, sĭ mơdrô lu bruă: Dăng kông, bơwih boh thâo mrô, boh thâo ia rơgơi, sĭ mơdrô điện tử, ia jrao, pơkra kyâo hăng pơdong sang kyâo, ngă hmua, pơkra ia jrao, anih đih pơdơi jưh tuai...Ñu pơsit amra pơtrut ngă hrŏm hăng Việt Nam amăng hơdôm bruă mơ̆ Khua dêh čar git gai; amra pơtô brơi boh thâo ia rơgơi, pơtô brơi mơnuih mă bruă gah Việt Nam đah mơ̆ng ngă bruă tŭ yua sui thun kơ dua bơnah./.