VOV4.Jarai - Tlam lơ 18/7, Khua dêh čar ơi Phạm Minh Chính tŭ jum ơi Axel van Trotsenburg, Khua git gai Sang bruă prăk rŏng lŏn tơnah (WB). Khua dêh čar lăng yôm bruă Khua WB rai čuă Việt Nam, brơi ƀuh tơlơi rô nao rai jai hrơi kơjăp, tŭ yua mơng dua bơnah; lăi Việt Nam lêng lăng WB jing gơyut klă, pô ngă gŏp gum pơđĭ kyar yôm biă; bơni kơ WB amăng lu thun hơmâo djru ba prăk kăk, pơtô brơi hơdră mă bruă, gum djru prong kiăng Việt Nam pơđĭ kyar bơwih ƀong huă - mơnuih mơnam. Lăi nao hơdôm bruă ƀơi rŏng lŏn tơnah hăng amăng kual, ơi Axel tŭ ư hăng tơlơi pơmin mơng Khua dêh čar kơ tơlơi pơmin dlăm, lăng nao abih bang rŏng lŏn tơnah, jak iâu gum pơgôp, ngă hrŏm jar kmar hăng ngă hrŏm lu bơnah, kiăo tui tơlơi pơmin “pran jua sit, đăo gơnang nao rai, tŭ yua”, hăng hơdôm hơdră pơsir bruă lăp djơ̆ hăng rim boh dêh čar pơsir hĭ hơdôm tơlơi glăk kiăng pơsir tañ kah hăng klin, ayuh hyiăng pơplih, rơnuk rơnua phrâo, rơnuk rơnua ia yua, mơnong ƀong huă...; amăng bruă anai, ơi Axel lăi tơlơi pơhiăp mơng hơdôm boh dêh čar kah hăng Việt Nam yôm biă mă.

Siu H’Mai: Pơblang