VOV4.Jarai-Ăt amăng hơdră mă bruă ƀơi hơdôm tơring čar kual Dap Kơdư, tlam lơ 28/4, grup mă bruă mơ̆ng Jơnum min Djuai ania yua kơ Khua ding jum, Jơnum min Djuai ania Hầu A Lềnh ngă khua hơmâo mă bruă hăng Jơnum min mơnuih ƀôn sang tơring čar Dak Lak kơ tơlơi pơhing bruă djuai ania laih anun bruă ngă tui jơlan hơdră kơnuk kơna djru kơ mơnuih djuai ƀiă; boh tơhnal pok pơhai lu hơdră pơtrun pơđĭ kyar bơwih ƀong huă mơnuih mơnam kual mơnuih djuai ƀiă dŏ hăng kual čư̆ siăng mơ̆ng thun 2021-2025 ƀơi Dak Lak.

Khua ding jum, Jơnum min Djuai ania Hầu A Lềnh đĭ pơhiăp amăng mông mă bruă

Tơdơi kơ hmư̆ tơlơi pơgôp hiăp, Khua ding jum, Jơnum min Djuai ania Hầu A Lềnh lăng yôm tơlơi gir run mơ̆ng tơring čar Dak Lak amăng bruă ngă tui jơlan hơdră djuai ania laih anun anăp nao ngă lu hơdră mơ̆ng dêh čar pơtrun. Thun blan rơgao Dak Lak ngă klă soh djop jơlan hơdră anai. Khua ding jum rơkâo tơring glông đing nao hloh dơ̆ng anŏ phara mơ̆ng kual plơi pla kiăng hơmâo jơlan hơdră pơsit djơ̆ lăp, tŭ yua kơ rĭm kual, rĭm djuai ania, pơtrut ngă tui kơtang hloh hơdôm kơčăo bruă prong, phun amăng hơdră kơnuk kơna djru.

Nay Jek: Pơblang