VOV4.Jarai - Lơ 26/4, Grup mă bruă mơng Jơnum min djuai ania yua Khua ding jum, Khua Jơnum min djuai ania ơi Hầu A Lềnh ngă khua grup hơmâo nao čuă, ngă bruă ƀơi să Ia Mơr (tơring glông Čư̆ Prong, tơring čar Gia Lai) kơ bruă ngă tui, pok pơhai bruă djuai ania amăng hrơi blan rơgao. Să Ia Mơr jing să guai dêh čar mơng tơring glông Čư̆ Prong. Abih bang să hơmâo 5 boh plơi, hăng 10 phung djuai ania hơdip hrŏm, amăng anun djuai ania Jarai truh lơ 70%.

 Khua ding jum, Khua Jơnum min djuai ania ơi Hầu A Lềnh pơhiăp ƀơi mông ngă bruă hăng să Ia Mơr.

Să glăk wai lăng rơbêh 14 rơbâo ektar glai rưng hăng lŏn glai. Să glăk jak iâu mơnuih ƀon sang tŭ mă pla glai hăng pơgang, pơlar glai rưng, pơđĭ kyar bơwih ƀong ngă hmua - pla kyâo kiăng hơmâo prăk lu hloh. Tui hăng Khua ding jum, Khua Jơnum min djuai ania Hầu A Lềnh, bruă wai lăng djuai ania ƀơi Ia Mơr thun blan rơgao hơmâo ngă hơdôm mơta bruă klă, kiăng bơni. Khă hnun, yua lŏn ngă hmua dŏ pơƀut phara, jơlan nao rai tơnap mơn, anun jing tơlơi hơdip mơnuih ƀon sang dŏ kơƀah. Ơi Hầu A Lềnh hơmâo lăi pơthâo hăng gong gai hơdră pơtrut tui hơdôm tơlơi gêh gal, tơlơi hơmâo, djru ngă tañ bruă hrŏ trun sang anŏ rin, biă ñu lĕ sang anŏ rin djuai ƀiă; kiăng să lăng ba, pơtrut tui gru grua hiam đưm hlâo mơng rim djuai ania pơlir hăng bruă pơđĭ kyar, hơkrŭ kơjăp gum pơgôp djuai ania.

Siu H’Mai: Pơblang