VOV4.Jarai - Tlam lơ 27/4, Grup hyu mă bruă mơng Jơnum min djuai ania yua kơ Khua ding jum, Khua Jơnum min djuai ania ơi Hầu A Lềnh, ba jơlan hlâo hơmâo mông mă bruă hăng Jơnum min mơnuih ƀon sang tơring čar Gia Lai kơ bruă djuai ania hăng pơđĭ kyar bơwih ƀong huă - mơnuih mơnam ƀơi kual mơnuih djuai ania ƀiă hăng kual ataih, asuek.

Hăng jơlan hơdră tui hơnong pơkă dêh čar amăng pơđĭ kyar bơwih ƀong huă - mơnuih mơnam amăng kual mơnuih djuai ania ƀă hăng kual ataih asuek rơwang thun 2021-2025, tơring čar Gia Lai rơkâo gơnong glông djru brơi giăm 6.000 klai prăk kiăng tơring čar pok pơhai, ngă tui hơdôm hơdră djru mơnuih mơnam, djru pơhrŏ trun ƀun rin. Amăng mông mă bruă, ơi Hầu A Lềnh brơi thâo Gia Lai hơmâo lu tơlơi đing nao kơ bruă djuai ania. Tơring čar hơmâo lu hơdră yôm amăng pơđĭ kyar bơwih ƀong huă mơnuih mơnam amăng kual mơnuih djuai ania ƀiă. Ơi Hầu A Lềnh rơkâo Gia Lai anăp nao tuh pơ alin lăp djơ̆ ƀiă dong brơi kual mơnuih djuai ania ƀiă, đing nao hơdôm kual rin rơpa.

Siu Đoan: Pơblang